Një lajm i publikuar në televizionin Fax News, lidhur me gjendjen në konviktin e vajzave në Gjirokastër, është bërë shkak për një përplasje mes drejtoreshës Doriana Demo dhe gazetares Ervina Çepuni Shehaj, e cila ka realizuar kronikën.
Në vëzhgimin e gazetares thuhet se kushtet në konvikt janë skandaloze, ndërsa drejtoresha u bënë presion studentëve që të dalin të dëshmojnë për punën e saj të mirë. Pas këtij lajmi ka reaguar vetë drejtoresha Doriana Demo përmes një shkrimi të gjatë në Facebook. Si fillim ajo hedh dyshime mbi diplomën e gazetares Ervina Çepuni Shehaj. Më tej thotë se qëllimisht ajo ka zgjedhur të filmojë 2-3 tualete që nuk ishin në kushte të mira, nga 23 të tilla që janë në konviktin e vajzave.
Demo e mohon të ketë ushtruar presion ndaj studentëve, si dhe akuzon gazetaren për shpifje. Vetë gazetarja, e ka komentuar qëndrimin e drejtoreshës duke shkruar në Facebook në një reagim të Telnis Skuqit për të njëjtën çështje. Ervina Çepuni Shehaj thotë se askush s’e ndalon që ajo të bëjë punën e saj. Nuk e tut as presioni, as shantazhi dhe as korrupsioni për të pasqyruar të vërtetën. Gazetarja paralajmëron se drejtoresha Demo do të mbajë përgjegjësi ligjore për ato që ka thënë ndaj saj. Shihni më poshtë reagimet e plota.
©argjiroja.net
