Gjatë këtyre ditëve të protestave studentët e Universitetit ‘Eqrem Çabej’ në Gjirokastër, përpiluan edhe një listë të tyre me 8 kërkesa të veçanta. Mes tyre binte në sy edhe kërkesa për pajisjen e tyre me Kartën e Studentit. Ky dokument unik në mbarë botën, për studentët në Gjirokastër dhe mbarë vendin, nuk është parë kurrë. Por fakti që universitetet e tjera në Shqipëri s’i kanë pajisur studentët me Kartë Studenti, nuk e amniston aspak Universitetin ‘Eqrem Çabej’. Pajisja me Kartë Studenti është detyrim ligjor i çdo institucioni të arsimit të lartë në Shqipëri. Jo vetëm ligji i Arsimit të Lartë i vitit 2015, por edhe ligji i vitit 2007 (Nr.9832) e kanë të përcaktuar qartë detyrimin e universiteteve për të pajisur studentët me Kartën e Studentit, dokument përmes së cilit ata përfitojnë lehtësi në shërbime të ndryshme publike e private.
Natyrisht që Karta e Studentit bëhet na bashkëpunim me pushtetin vendor. ArgjiroLajm.net u interesua pranë Bashkisë Gjirokastër nëse ka pasur ndonjëherë kërkesë apo përpjekje prej Universitetit ‘Eqrem Çabej’ për t’i pajisur studentët me Kartë. Rezulton se ka zero përpjekje! Asnjëherë drejtuesit e Universitetit të Gjirokastrës nuk kanë lëvizur gishtin për të përmbushur një detyrim ligjor karshi studentëve.
Karta e Studentit në Gjirokastër është një dështim sistematik që bashkon drejtuesit e këtij universiteti ndër vite dhe natyrisht pushtetin vendor. Së paku asnjë nga tre rektorët e fundit, Bektash Mema, Gëzim Sala e Kristaq Kikina, nuk kanë inicuar një përpjekje të vetme, asnjë bashkërendim pune me Bashkinë Gjirokastër, për të pajisur të rinjtë e të rejat me Kartën e Studentit. Ky dokument që lehtëson ndjeshëm jetesën dhe aktivitetin e studentëve bëhet në bashkëpunim me pushtetin vendor.
Për fat të keq në Gjirokastër ka zero iniciativë në këtë drejtim. Karta e Studentit u krijon mundësi të rinjve nga 18 në 28 vjeç të përfitojnë shërbime e produkte me çmime të reduktuara apo me kushte më të favorshme për ta. Fjala vjen transport falas ose me çmim të reduktuar, bileta për kinema, muzeume, ambiente sportive, restorante apo njësi të tjera kundrejt një çmimi të reduktuar. A do ta bëjë Universiteti i Gjirokastrës këtej e tutje Kartën e Studentit? Derisa nuk është bërë për gjithë këto vite, zor të shpresohet se do të bëhet.
Deri më tani të gjithë bashkë, prej Bektash Memës e me radhë, mbaheni mend si akademikë që thjesht keni ndërruar vendet me njëri-tjetrin në poste drejtuese, keni punësuar familjarët tuaj dhe e keni ‘vulosur’ rrënimin e universitetit. Të paktën le të dalë dikush nga ju të bëjë diçka ndryshe, le të dalë dikush të çojë deri në fund zbatimin e ligjit; Kartë Studenti për të gjithë ata që studiojnë në Universitetin ‘Eqrem Çabej’. E sigurt se ai që e bën këtë gjë, ka për t’u mbajtur mend më gjatë se çdo drejtues tjetër dhe do të meritojë respektin e studentëve.
©argjiroja.net
