Skandali i denoncuar në emisionin ‘Stop’ për diplomën e falsifikuar të Rigels Maliles, punonjës i Bashkisë Gjirokastër, ka edhe një dimension tjetër, përveç rivalitetit të brendshëm në kampin e njerëzve të LSI-së. Është fjala për konfliktin e heshtur mes kryebashkiakes Zamira Rami dhe familjes Tavo për çështjen e fondeve në Klubin Luftëtari. Siç dihet, Rigels Malile ka mbajtur edhe pozicionin e drejtorit sportiv në Klubin Luftëtari. Në fillim të këtij muaji, gazeta ‘Panorama Sport’ publikoi një shkresë që ai i kishte drejtuar aksionerëve të klubit; Grigor Tavo, Vangjel Tavo dhe Bekim Halilaj, përmes së cilës i tregonte për gjendjen e rëndë financiare në klub. Natyrisht që asnjë prej aksionerëve nuk ishte i interesuar që ky dokument të dilte në media.
Dyshimet janë se ishte pikërisht Rigels Malile, ai i cili e serviri te ‘Panorama Sport’ këtë dokument që tregonte krizën financiare të Luftëtarit. Për këtë veprim sigurisht që ai mund të jetë shtyrë nga kryebashkiakja Zamira Rami, e cila ka qenë e vetmja e interesuar për daljen në media të këtij problemi që demaskonte keqadministrimin e Luftëtarit nga Tavo. Bashkia Gjirokastër nuk ka më fonde për të mbuluar gropën financiare të Luftëtarit, ndonëse përveç grantit, mban me rroga rreth 10 punonjës të klubit, edhe pse kjo është detyrim i Tavos. Rrjedhja në media e kësaj shkrese që diskreditoi familjen Tavo dhe aksionerin tjetër, sigurisht që nuk është mirëpritur nga aksionerët. Hakmarrja është një pjatë që serviret e ftohtë. Kështu mund të ketë ndodhur edhe me Rigels Malilen. Diploma e tij e falsifikuar nuk mbërriti tek emisioni ‘Stop’ nga rastësia. Pikërisht ata që e dinin për këtë fakt, e çuan në emisionin investigativ. Dhe me siguri që Vangjel Tavo është një prej atyre që e ka ditur për diplomën e Maliles.
Në mos e ka ditur më parë, natyrisht e ka marrë vesh së fundi, kur është miqësuar me gazetarin që para pak kohësh e shante me libër shtëpie, atë si deputet dhe Zamira Ramin si kryebashkiake. A e ka çuar Vangjel Tavo te emisioni ‘Stop’ skandalin e diplomës së Rigels Maliles? S’e themi dot me siguri këtë gjë sepse s’kemi fakte, por intuita dhe analiza e atyre që ka ndodhur të çojnë pikërisht tek ai. Kujtoni edhe diçka tjetër. Emisioni ‘Stop’, jo rastësisht, ka qenë pikërisht ai që iu qep nga pas edhe Kristaq Thimios, ‘armikut’ të Vangjel Tavos. Morali i kësaj historie përmblidhet pikërisht në këtë shprehje. “Njeriu gëlltit diku një lugë çorbë të prishur dhe e vjell tërë jetën”….
©argjiroja.net
