Klubi i futbollit Luftëtari nuk ka vetëm borxhe ndaj futbollistëve për rroga të prapambetura, por edhe ndaj shtetit. Borxhi i akumuluar në Tatime nga mosshlyerja e detyrimeve të kontributeve të sigurimeve shoqërore dhe taksave të tjera është i konsiderueshëm.
Argjirolajm.net zbulon një shkresë të datës 20 dhjetor të këtij viti, përmes së cilës Drejtoria e Tatimeve Gjirokastër njofton Klubin Luftëtari, se do t’i mbledhë me forcë detyrimet e prapambeturaa. Sipas shkresës, xhiro ditore e klubit do të monitorohet nga Tatimet dhe në fund të çdo dite pune do të konfiskohet një vlerë jo më pak se 50% e saj.
Kjo praktikë thonë Tatimet, do të vijojë deri në shlyerjen e plotë të borxhit që Luftëtari ka ndaj shtetit. Edhe pse është disi e paqartë se si do merren këto detyrime përmes xhiros ditore, duke e ditur që ky klub nuk ka arkëtime të përditshme, tentativa në letra për t’i mbledhur borxhet është një akt që duhet vlerësuar.
Në buxhetin e vitit 2019, Bashkia Gjirokastër ka parashikuar 230 milionë lekë të vjetra për Klubin Luftëtari. Por edhe pse merr para nga bashkia, Gole Tavo e ka futur klubin në një krizë borxhesh prej keqmenaxhimit dhe paaftësisë. Sikundër ka zëra që thonë se broxhi i brendshëm i klubit është rritur vetë në mënyrë fiktive, me qëllim që Gole Tavo të vazhdojë të marrë para nga Bashkia Gjirokastër.
©Argjirolajm.net
