Kryetarja e LSI-së, Monika Kryemadhi zhvilloi një takim sot me strukturat dhe simpatizantët e partisë së saj në qytetin e Gjirokastrës. Nëse i ndjek me vëmendje fjalimet dhe krejt takimin, lajmi nuk është ajo, as ligjërimi i saj i vakët pa karizëm e lidership dhe natyrisht as akuzat për keqqeverisjen e Edi Ramës që janë thënë e stërthënë me qindra herë prej saj. Lajmi në këtë takim është deputeti Vangjel Tavo. Rreth 10 minuta ishte fjalimi i tij përmbyllës i takimit të LSI-së, por dy fjalë nuk guxoi që t’i thoshte me zë dhe figurë.
Së pari Tavo nuk e përmendi asnjëherë emrin e Edi Ramës, as Rilindjen, as krimin e organizuar, as bandat apo drogën, të cilat janë refreni i opozitës dhe vetë Monika Kryemadhit. Tavo foli me fjali gjeneraliste, përmendi eksodin e shqiptarëve drejt emigracionit, citoi Winston Churchillin, ngriti lart protestën studentore dhë kërkoi bashkim në atë që ai e quajti ‘Fronti i së Ardhmes’.
Më tej theksoi nevojën për rikthimin e shpresës së munguar në këto 30 vjet, a thua se ai është një politikan fringo i ri dhe e ka luksin të na japë ende leksione demokracie. Vangjel Tavo është po aq fajtor sa e gjithë klasa politike në këto 30 vjet dhe s’mund të na shpërfaqet si alternativë e re. I tha të gjitha këto, por nuk e zuri në gojë emrin e Edi Ramës dhe as e kriminalizoi qeverisjen e tij, siç bën Monika Kryemadhi dhe krejt opozita. Kjo sjellje e tij nuk është rastësi.
Vangjel Tavo nuk është më i njëjti. Me siguri ai e ka një pakt me Edi Ramën, që prej momentit kur kryeministri i çoi bashkëshorten, Sonila Popa, si anëtare të Këshillit Mbikëqyrës në Bankën e Shqipërisë. Vangjel Tavo nuk mund të flasë për ‘mazhorancë të kriminalizuar’, kur me votat e kësaj mazhorance bashkëshortja e tij mori mandatin në Bankën e Shqipërisë.
Prandaj deputeti i LSI-së ishte sot në siklet dhe zgjodhi të fliste si lektor i shkencave politike, duke mos qenë në të njëjtën gjatësi vale me ‘shefen’ e tij dhe as me opozitën në tërësi. Se çfarë marrëveshje ka bërë Tavo me Ramën, këtë s’e dimë ende, por me siguri që çuarja e bashkëshortes së tij në Bankën e Shqipërisë do ta diktojë jo pak edhe sjelljen politike të deputetit të Gjirokastrës. Fjala në takimin e sotëm ishte shkëndija e parë. Kemi ende për të parë e mësuar. Tavo është formalisht me LSI-në dhe sot ka folur nga halli.
Së dyti, sot Vangjel Tavo humbi një tjetër rast për t’u distancuar nga thirrjet antishqiptare në Bularat gjatë varrimit të ekstremistit Kostandin Kacifas. “Zjarr dhe sëpatë për qentë shqiptarë”, ishin disa prej thirrjeve. Sot e kësaj dite Tavo, deputet prej 20 vitesh me vota të shqiptarëve, nuk i ka dënuar ato thirrje.
Ne nuk e duam këtë qëndrim të Tavos për ndonjë ego të sëmurë nacionaliste, por në respekt të etnisë dhe përkatësisë tonë. Ai duhej dhe duhet të distancohet nga ato thirrje, në të kundërt nuk mund të ketë moral të kërkojë sërish vota e as të na japë leksione demokracie në Gjirokastër. Banorët e qarkut Gjirokastër dhe jo vetëm, që e kanë mbështetur Vangjel Tavon për gjithë këto vite, duhet t’ja kërkojnë atij distancimin nga thirrjet antishqiptare në Bularat. Kush nuk e bën, fyen inteligjencën e vet dhe nënçmon identitetin kombëtar. Ndqini në videon më poshtë fjalimin e tij të plotë, pas fjalës së Kryemadhit.
©Argjirolajm.net
