Në zonën e mbrojtur “Bredhi i Sotirës” monument natyre i kategorisë III, punonjësit e Agjencisë Kombëtare të Zonave të Mbrojtura, Gjirokastër kanë kryer ditët e fundit monitorime. Qëllimi është parandalimi i gjuetisë dhe mbrojtja e jetës së egër në këtë park, ku vlerat natyrore zënë një vend kryesor në thesarin e vlerave të tij.
Punonjësit e Agjencisë Kombëtare të Zonave të Mbrojtura, Gjirokastër u bëjnë apel të gjithë dashamirësve të natyrës të kontribuojnë në parandalimin njëherë e përgjithmonë të fenomenit kriminal të gjuetisë së paligjshme.
Zona e Mbrojtur “Bredhi i Sotirës”, Monument Natyre i kategorisë III, e vendosur në jug të Shqipërisë, në Njësinë Administrative “Dropull i Sipërm”, shtrihet në një sipërfaqe prej 1740 ha.
Ai konsiderohet si një perlë të natyrës shqiptare, qoftë nga pikpamja eko-turistike si dhe nga ajo shkencore.
Për të shkuar në “Bredhin e Sotirës” përshkohet rruga nacionale Gjirokastër – Llongo – Sotirë. Përfaqësuesit specifikë të florës në këtë zonë janë Bredhi i Maqedonisë, gështenja, panja e malit, bunga, shkoza, dëllenja, prralli, marreja etj. Ndërsa fauna përfaqësohet nga: derri i egër, lepuri i egër, ujku, kaprolli, dhelpra, thëllëza e malit etj. Shpatet e maleve, rrjeti i përrenjve me shumë shtigje ofrojnë mundësi për ekoturizëm dhe alpinizëm.
