Atentati me tritol mbrëmjen e djeshme në Gjirokastër ndaj biznesmenit Ndërtim Muxhai, i njohur edhe me emrin Kleo Bello, është i fundit në serinë e 5 ngjarjeve kriminale që kanë ndodhur brenda 5 ditësh në rang qarku. Kujtojmë se më datë 20 janar, në Tepelenë, persona të maskuar grabitën tre biznese: Supermarket ‘ZENELI’, dyqan bulmeti ‘ALIKO’ dhe pasticeri ‘DERVISHI’.
Në supermarket morën me vete dhe sistemin e kamerave të sigurisë për të humbur gjurmët. Mësohet se shuma e vjedhur ishte rreth 600 mijë lekë, plus edhe paketa cigaresh me vlerë 5 milionë lekë.
Dy ditë më vonë në Memaliaj ndodhi dhunimi dhe grabitja e kambistit Mustafa Mustafai dhe bashkëshortes së tij. Sipas policisë atij iu morën nën kërcënimin e armës 50 mijë lekë të reja dhe nja aparat celulari. Pra, në harkun kohor të 5 ditëve kanë ndodhur 5 ngjarje kriminale dhe deri më tani nuk ka asnjë person të arrestuar. Ngjarjet vijojnë të jenë të pazbardhura.
Kjo ngre shumë pikëpyetje për punën e Policisë së Shtetit në qarkun Gjirokastër dhe cënon sigurinë publike. Atentati i sotëm me tritol ishte mbase kulmi i një situate kriminaliteti të pazakontë për qarkun Gjirokastër. Policia e Shtetit, Prokuroria dhe Shërbimi Informativ duhet të rrisin forcën goditëse ndaj krimit për të rikthyer normalitetin dhe qetësuar qytetarët.
©argjiroja.net
