Nga Etleva Delia
Operacioni policor i së shtunës, “Rruga e gabuar”, gjatë të cilit u arrestuan 32 persona që trafikonin klandestinë përmes dokumenteve të falsifikuara, dyshohet se mund të jetë dekonspiruar.
Vetëm në këtë formë mund të shpjegohet fakti që i dyshuari kryesor, i cilësuar si kreu i grupit kriminal, Dritan Gramozi, nuk u arrit të arrestohej. Ai u arratis vetëm pak çaste para operacionit.
Gramozi “u zhduk” nga lokali ku po mbahej nën vëzhgim nga agjentë civilë të Policisë, teksa ndodhej duke pirë kafe me bashkëpunëtorin e tij më të afërt në grup, shtetasin Rezart Hoxha. Ky i fundit u arrestua, ndërsa nuk u mësua dot se çfarë ndodhi me shokun e tij, që ishte në të njëjtën tavolinë.
Krejt papritur, 44-vjeçari Dritan Gramozi iu humbi nga sytë agjentëve që e vëzhgonin dhe nuk u gjet më për ta arrestuar. Për këtë arsye, Shërbimi për Çështjet e Brendshme dhe Ankesat ka nisur një verifikim nëse është dekonspiruar apo jo operacioni “Rruga e gabuar”.
Megjithatë, nuk përjashtohet mundësia që Dritan Gramozi është treguar vigjilent apo edhe ndonjë pakujdesi e agjentëve civilë që ishin me mision, ka bërë që ai të kuptojë gjithçka dhe të arratiset.
Burime nga grupi hetimor thanë se Dritan Gramozi është njeriu që prodhonte dhe siguronte dokumente të falsifikuara, jo vetëm karta identiteti, por edhe pasaporta greke, italiane, bullgare dhe çeke. Nga ana tjetër, burimet saktësojnë se 44-vjeçari Gramozi, nga fshati Stjar i Delvinës, pasi gjente përmes bashkëpunëtorëve të tij personat që do të udhëtonin në mënyrë të paligjshme u mundësonte atyre edhe kalimin e paligjshëm përmes pikave të Qafë-Botës dhe Kakavijës.
Por ky grup kriminal, sipas Prokurorisë, kishte edhe një “shërbim” të veçantë që ua ofronte personave të interesuar. Bënte të mundur fshirjen e vulave të vendosura në pasaportë, në momentin e deportimit nga vendet e Bashkimit Europian.
PANORAMA
