Një javë para mbajtjes së Kongresit në Tiranë, socialistët e qarkut Gjirokastër janë mbledhur në një takim me ministrin dhe drejtuesin politik të qarkut, Bledi Çuçi. Sipas asaj që shkruan vetë Çuçi në Facebook, në fokus të diskutimit ishte pikërisht Kongresi dhe zgjedhjet lokale të qershorit.
“Takim me strukturat e PS në qarkun Gjirokastër. Në fokus Kongresi i së shtunës dhe më pas zgjedhjet lokale, një sfidë që ne do ta fitojmë sepse jemi e vetmja alternativë ku shqiptarët kanë besim dhe shohin shpresën për të çuar përpara punët që kemi nisur”, shkruan Çuçi.
Por ajo që rë në sy gjatë takimit ishte mungesa e deputetëve Flamur Golemi e Mirela Kumbaro. Kujtojmë që Golemi përflitet si kandidati i mundshëm i socialistëve për Bashkinë Gjirokastër. Edi Rama ka thënë se kandidatët do t’i prezantojë në Kongres. Megjithatë kjo nuk është fort e sigurt për shkak të zhvillimeve politike pas daljes së opozitës nga parlamenti.
Skenari i shtyrjes së zgjedhjeve lokale është i mundshëm. E nëse kjo ndodh, natyrisht që edhe Edi Rama do ta shtyjë zyrtarizimin e kandidatëve me qëllim që të mbajë nën presion të vetët. Sidoqoftë duhet të presim deri të shtunën për të mësuar më tepër.
©argjiroja.net