Në Kongresin e Partisë Socialiste, kryeministri Edi Rama i bëri një sfidë të hapur opozitës, duke thënë se nëse do të arrinin të fitonin një bashki më tepër të socialistët në zgjedhjet lokale të 30 qershorit, vendi shkon në zgjedhje të parakohshme brenda vjeshtës së këtij viti.
Por le të kthehemi te zgjedhjet e fundit lokale, ato të vitit 2015. Ndryshe nga katër vite më parë, LSI dhe PDIU, të cilat kanë një numër të konsiderueshëm votash, kanë kaluar në kampin blu.
Bazuar në votat e vitit 2015, Partia Socialiste do të humbiste Bashkinë e Tiranës. Kjo pasi PS me aleatët e vegjël do të kishin 124 mijë vota, nga 155 mijë vota që do të kishin partitë e opozitës, ku përfshihen tre partitë kryesore PD,LSI, PDIU si edhe aleatët më të vegjël.
Në të njëjtën mënyrë, në bazë të votave të vitit 2015, PS do të humbiste edhe bashkinë e Durrësit, të Elbasanit dhe të Fierit. Gjithashtu nuk do të arrinte të fitonte as në Lezhë, në Kukës, në Shkodër dhe në Gjirokastër, bashki që aktualisht drejtohen nga PD dhe LSI. Nga bashkitë e mëdha, PS do të arrinte të fitonte vetëm Korçën dhe Vlorën.
Përsa i përket zgjedhjeve të përgjithshme të vitit 2017, në rand vendi, koalicioni opozitar i përbërë nga PD, LSI dhe PDIU ka 758 mijë vota, rreth gjashtë mijë vota më pak se Partia Socialiste e cila ka marrë 764 mijë vota.
Gjithsesi këto janë llogaritje matematikore bazuar në votat e zgjedhjeve të kaluara. Nga ana tjetër, si Edi Rama ashtu edhe Lulzim Basha thonë sipas sondazheve të tyre, rezultojnë fitues në zgjedhjet lokale të 30 qershorit. Përtej llogarive, çështja që shtrohet është a do të kemi zgjedhje lokale më 30 qershor? Opozita duket e bindur në vendimin e saj për t’i bojkotuar dhe mazhoranca po aq e bindur që të marrë pjesë vetëm./Opinion.al
