Aksion i madh i Forcave të Ndërhyrjes së Shpejtë dhe Strukturave Speciale Operacionale, për arrestimin e një grupi të akuzuar për trafik ndërkombëtar droge. Mes të arrestuarve, edhe zv.drejtori i Spitalit në Sarandë.
Pasditen e së hënës, forca të shumta policie të FNSHsë dhe Forcave Operacionale kanë arrestuar disa persona në Sarandë. Në aksion merrnin pjesë dhe forca të Komisariatit të Sarandës dhe Vlorës, si dhe punonjës të Shërbimit Informativ Shtetëror. Fillimisht, dhjetëra punonjës policie me maska rrethuan një bllok ndërtesash mbi rrugën numër 5.
Më pas, aksioni u shtri dhe në zona të tjera të qytetit të Sarandës. Sipas të dhënave, bëhet fjalë për një grup që merret me trafikimin ndërkombëtar të lëndëve narkotike, por detaje të tjera mbahen sekret nga Policia, pasi aksioni vijon ende. Deri tani, Policia ka shoqëruar të paktën 10 persona në Komisariatin e Sarandës.
Në një prej banesave që Policia hyri për kontroll, porta u hap me forcë. Por pavarësisht kësaj, ndërhyrja doli huq, sepse brenda në shtëpi nuk u gjet personi që kërkohej nga Policia. Nga 10 personat e shoqëruar fillimisht në Komisariatin e Policisë në Sarandë, tetë prej tyre janë transportuar nën masa të rrepta sigurie drejt Prokurorisë për Krimet e Rënda në Tiranë, ku pritet të merren në pyetje nga hetuesit.
Ndërsa dy prej të shoqëruarve, të cilat janë gra, janë lënë në hetim në gjendje të lirë. Mes të arrestuarve janë Florenc Llanaj, nëndrejtor i Spitalit Rajonal të Sarandës, si dhe një futbollist i ekipit të Butrintit, Adrian Xhibro. Llanaj mësohet se kishte vetëm pak muaj që kishte marrë detyrën e nëndrejtorit. Gjithashtu u arrestuan vëllai i futbollistit, Edvin Xhibro, bashkë me gruan e tij, e cila u la në detyrim paraqitjeje, si dhe Mikel Jorgji dhe Armando Zholi. Mikel Jorgji është një emër i njohur për Policinë, pasi 37-vjeçari është arrestuar edhe para 10 vitesh, po për trafik droge.
I riu nga Saranda, në prill 2009, në bordin e një skafi do të transportonte 300 kg kanabis nga vendi i quajtur “Pema e Thatë”, për në ishullin e Korfuzit në Greqi. Hashashi ishte marrë nga Lazarati. Në atë kohë, Jorgji në bashkëpunim me persona të tjerë kishin arritur që ta nxirrnin nga bllokimi skafin për ta përdorur për trafik të lëndëve narkotike. Mjeti lundrues ishte në pronësi të një gruaje nga Saranda dhe pas targimit dhe matrikulimit ishte vendosur në bllokazh në kuadër të moratoriumit për skafet.
Këta persona dyshohet se janë pjesë e një grupi të strukturuar kriminal, që merrej me trafikimin e lëndëve narkotike drejt Greqisë dhe Italisë. Grupi hetohej prej kohësh për veprimtari në trafikun ndërkombëtar të drogës. Saranda është një nyje e transportimit të sasive të mëdha të marijuanës drejt Greqisë përmes kufirit tokësor, por edhe një pikë transiti e trafikimit të llojeve të forta të drogës, si heroinë dhe kokainë.
TË ARRESTUARIT
Florenc Llanaj, 30 vjeç, nëndrejtor i Spitalit Sarandë
Adrian Xhibro, 30 vjeç, futbollist i Butrintit
Edvin Xhibro, vëllai i futbollistit
Mikel Jorgji, 37 vjeç, me precedentë
Armando Zholi
PANORAMA
