Nesër shqiptarët do t’i drejtohen kutive të votimit për të zgjedhur kryebashkiakët e rinj. Sa i përket qarkut Gjirokastër deri më tani situata është e qetë. Nuk ka raportime për incidente nga mbështetësit e opozitës. Por e diela nuk është se do të jetë totalisht një ditë e qetë. Militantë të opozitës do të tentojnë të krijojnë incidente.
Në Gjirokastër PD i ‘mati forcat’ disa ditë më parë kur u tubua para KZAZ-së, me shpresën se do t’i nxirrte jashtë pallatit të sportit komisionerët dhe materialet zgjedhore. Dështoi me sukses dhe nuk tentoi për herë të dytë të rikthehej aty. Po kështu dështoi edhe në Dropull. Një ditë më parë drejtuesit e PD u mblodhën në Libohovë në një takim, ku me gjasë janë shpërndarë porositë e fundit për të dielën.
A do të ketë një sulm ndaj KZAZ-së së Libohovës? Kjo mbetet për t’u parë nesër. Policia ka marrë në mbrojtje këtë institucion prej disa ditësh. Sidoqoftë nga ajo që pamë në Vaun e Dejës, ku u sulmua dhe u dogj KZAZ-ja, përgjigjja e policisë ishte e ashpër. Personat e përfshirë në ngjarje u arrestuan dhe kryebashkiaku u shkarkua.
Nga ana tjetër paralajmërimi është i rreptë. Kushdo që cënon zgjedhjet shkon në burg, pengohet të dalë jashtë shtetit dhe privohet nga punësimi në administratën publike. Përvec kësaj tashmë është e qartë, Basha dhe Kryemadhi u tërhoqën pas presionit amerikan. Mesazhi i Palmer një ditë më parë ishte i qartë. Dhuna në zgjedhje nga militantët e opozitës do të cojë në ndërprerje të marrëdhënieve të SHBA-së me PD-LSI.
Thënë këto, nuk pritet që nesër të ketë ndonjë hata të madhe. Maksimumi që do të bëjë opozita në Gjirokastër, është të ndikojë tek njerëzit e vet të mos dalin në zgjedhje. Asgjë tjetër nuk do të guxojnë, të paktën në Gjirokastër. Jo për gjë, por s’kanë as mbështetje popullore. Janë vetëm një grup i vogël njerëzish që flasin në emër të popullit.
©argjiroja.net
