Kreu i Grupit parlamentar socialist, Taulant Balla, i pyetur rreth qëndrimit të kryebashkiakëve të djathtë për të mos liruar zyrat dhe nëse do të përdoret policia për futjen e kryebashkiakëve të rinj, theksoi se ka një afat kushtetues për ta që është data 10 gusht. Sipas Ballës, askush nuk mund të qëndrojë në zyrë pas kësaj date sepse ata nuk janë zgjedhur.
Më tej numri dy i PS-së ironizoi kryebashkiakët duke u shprehur që t’u japë kreu i PD-së Lulzim Basha nga një zyrë.
“Ka një afat kushtetues të mandatit të kryebashkiakëve. Për ata që nuk janë zgjedhur afati përfundon më 10 gusht. Asnjëri prej tyre nuk qëndron. Këto vetëdeklarimet janë pjesë e sjelljes gaztoreske që ka bashkuar SHQUP-in e LSI. Procesi është shumë i qartë dhe besoj brenda dy javëve të ardhshme marrin detyrën kryebashkiakët e rinj. Të gjithë kryetarët që nuk janë rizgjedhur kanë mbaruar mandatin e tyre, ndaj dhe nuk mund të qëndrojnë asnjë ditë dhe nuk mund të japin asnjë shërbim. Unë ju sugjeroj të mblidhen në SHQUP dhe t’iu japë Luli nga një zyrë. Në Shkodër apo në Kamëz kryetarët e rinj duhet të fillojnë menjëherë, për të çliruar ato bashki nga pengmarrja politike shumëvjeçare dhe për ta vënë atë në krye të punëve dhe shërbim të njerëzve”, tha Balla në rubrikën “Opinion” në News 24.
