Kryedemokrati Lulzim Basha ka denoncuar me video në rrjetet sociale abuzimin që sipas tij po bën qeveria me ndërtimin e rrugëve. Sipas Bashës, 1 km rrugë në Shqipëri kushton 10 herë më shtrenjtë se në Europë dhe botë. Kryedemokrati thotë se qëllimi nuk është përmirësimi i infrastrukturës rrugore, por vjedhja e parave të shqiptarëve.
Më konkretisht, lideri i opozitës denoncon koncesionin e rrugës Thumanë-Kashar me gjatësi 20.8 km dhe kosto investimi 333 mln euro. Basha thotë se studimi i fizibilitetit zbuloi se kostoja e ndërtimit të kësaj rruge është 169 mln euro, ndërsa kostoja reale për 20.8 km rrugë, përllogaritet 80 mln euro.
“Shqiptarëve u grabiten 253 mln euro“, thotë Basha.
Postimi i Bashës
Në vend të ndërtimit të infrastukturës, të rrugëve, të porteve, të linjave të energjisë Edi Rama po vjedh paratë e shqiptarëve gjoja për të bërë rrugë.
Në vendin më të varfër të Europës një kilometër rrugë kushton dhjetë herë më shtrenjtë se në vendet më të pasura të botës, më shtrenjtë se në Amerikë, Gjermani apo Zvicër.
Sepse këto janë projekte për të vjedhur. #HajdutiPsiqik #RamaIk