Kontrabandimi i migrantëve dhe trafikimi i qenieve njerëzore në qarkun Gjirokastër ishte në qendër të tryezës teknike rajonale dhe strukturave lokale në takimin e zhvilluar sot në Prefekturën e Gjirokastrës nga Ministria e Brendshme dhe Organizata Ndërkombëtare e Migracionit (IOM).
Të pranishëm në këtë takim ishin drejtori i Azilit dhe i Shtetësisë, Sokol Sheti, drejtoresha e Antitrafikut dhe Migracionit Julia Done, drejtori i Kufirit dhe Migracionit, Shaban Nexhi, koordinatorja e Drejtorisë Antitrafik, Ina Zhupa, përfaqësuesja e organizatës IOM, Alketa Gaxha.
Në fjalën e tij, prefekti i qarkut të Gjirokastrës, Astrit Aliaj, theksoi domosdoshmërinë e bashkërendimit të veprimeve shtetërore dhe joshtetërore, për parandalimin e fenomenit të trafikimit të qenieve njerëzore dhe parandalimin e viktimave të mundshme të trafikimi dhe kërkoi marrjen e masave për mbrojtjen e individëve dhe grupeve të rrezikuara nga trafikimi, në mënyrë të veçantë të grave dhe fëmijëve.
“Roli i tryezës teknike është tejet i rëndësishëm në përcaktimin e veprimeve të nevojshme për parandalimin e trafikimit dhe mbrojtjen e familjeve, grupeve, personave dhe fëmijëve në situatë rruge, të cilët janë edhe më të predispozuar ndaj këtij fenomeni”, nënvizoi Aliaj.
Në cilësinë e kryetarit të Komitetit Rajonal, Prefekti kërkoi ndaj anëtarëve të tryezës teknike përgjegjësi të lartë në zbatimin e detyrave të lëna.
