Një ceremoni përkujtimore në Gjirokastër për nder të disa dëshmorëve nacionalistë që ranë 76 vite më parë pas përplasjes me forcat pushtuese italiane, u shndërrua në një përleshje banale mes dy grupimeve që mbështesin Ballin Kombëtar. Më shumë sesa banaliteti i këtij incidenti, ajo që ka rëndësi në këtë ngjarje është hipokrizia e Partisë Demokratike.
Qëndrimi zyrtar i PD-së është se deputetët që hynë në Kuvend pasi opozita dogji mandatet janë në shërbim të Ramës dhe bëjnë fasadën e qeverisë së tij. Ish-deputeti i Gjirokastrës, Tritan Shehu, u ka gjetur edhe një epitet, i quan ‘pupac’ (kukull). Pavarësisht këtij qëndrimi, në ceremoninë e organizuar sot nga Partia Demokratike Gjirokastër, ishte i pranishëm edhe deputeti Artur Roshi, i cili është një prej ‘pupacëve’ që mori mandatin e deputetit.
Roshi, kryetari i Ballit Kombëtar Demokrat, shpërfilli thirrjen e PD-së dhe hyri në Kuvend. Pra, nga njëra anë PD i quan kukulla deputetët e opozitës parlamentare, por nga ana tjetër i bën pjesë të organizimeve të saj. Kjo është hipokrizi dhe delegjitimon vetë PD-në. Kryetari Dasho Aliko e shprehu qartë ditën e sotme se Artur Roshi nuk ishte i ftuar në ceremoninë që kishte organizuar PD Gjirokastër, por ata nuk mund ta ndiqnin.
Dakord, qasja miqësore dhe njerzillëku i Dasho Alikos është i kuptueshëm, por ata nuk ishin mbledhur aty për ndonjë dasëm apo ishin duke shkuar në stadium. Ajo ishte një ceremoni zyrtare e organizuar nga PD-ja, prandaj prania e Artur Roshit, ‘deputetit tradhtar që i shërben Edi Ramës dhe që harroi gjakun e të parëve’, nuk duhej lejuar nga Dasho Aliko. S’jemi duke thënë që Artur Roshin ta përzënin me dru. Kjo do të ishte çmenduri më vete, por në momentin që ai mbërriti duhej larguar për aq kohë sa PD-ja zyrtarisht ka atë qëndrim që dihet ndaj deputetëve të opozitës parlamentare.
Edhe sikur grupi i mbështetësve të Adriatik Alimadhit, kryetarit të partisë tjetër Balli Kombëtar, të mos e kishte shkaktuar incidentin sot, sërish Artur Roshi nuk mund të ishte në atë ceremoni bashkë me PD-në. Kjo e fundit ka një qëndrim zyrtar ndaj deputetëve të opozitës parlamentare si Artur Roshi, prandaj nuk mund të shfaqet përkrah tyre në ceremoni zyrtare. E zëmë se nuk do të ndodhet incidenti. Dasho Aliko, Luan Baçi dhe Enkelejd Alibeaj do t’u flisnin demokratëve duke patur në krah të tyre edhe ‘tradhtarin Artur Roshi që i shërben Edi Ramës në Kuvend’.
Nga njëra anë PD thotë se nuk i njeh ata deputetë dhe i quan kukulla të Edi Ramës, nga ana tjetër shfaqet në publik me ta dhe pozojnë para kamerave. Prej kësaj hipokrizie të PD-së mund edhe të përligjet reagimi i grupit kundër Artur Roshit, të cilët me të drejtë i thanë edhe vetë disa herë Dasho Alikos: Ndaje mendjen, o do jesh me Bashën ose me Artur Roshin që i shërben Edi Ramës.
©argjiroja.net
