Nga toka dhe deti autoritetet greke janë duke zhvilluar sot një mega-operacion, ku deri më tani kanë sekuestruar 1 ton kanabis. Operacioni po zhvillohet në veri të ishullit Skopelos, ku dyshohet se ka sasi të mëdha droge.
Mediat greke shkruajnë se në operacion janë agjentë të specializuar për të tilla operacione, përfshirë edhe qentë anti-drogë. Droga ishte e fshehur në një shpellë në ishullin Piperi.
Lënda narkotike e llojit kanabis, ishte e fshehur në disa kuti. Ky operacion, i koordinuar nga DEA dhe Policia greke kërkon të godasë një rrjet të trafikut të drogës Shqipëri-Greqi-Turqi.
Operacioni i ditës së sotme, lidhet me atë të zhvilluar disa ditë më parë, ku u sekuestruan dy gomone me drogë dhe u prangosën disa persona, mes tyre dy skafistë shqiptarë.
