Kryebashkiaku i Gjirokastrës, Flamur Golemi, ka qenë në azilin e të moshuarve sot me rastin e Ditës Ndërkombëtare të të Moshuarve. Në dallim nga herët e tjera, ku zakonisht thjesht bëhej një shtrëngim duarsh me banorët e kësaj rezidence dhe ndonjë kokteil, Golemi ka përveshur mëngët dhe ka vënë përparësen e kuzhinerit, për të përgatitur drekën dhe për t’ua shërbyer të moshuarve.
“I lumtur pafund që sot të gatuaja, modestisht me aq sa di, dhe të shërbeja drekën për të moshuarit që jetojnë në Shtëpinë e të Moshuarve në Gjirokastër. Dita Ndërkombëtare e të Moshuarve është ndër të tjera një moment kur duhet të reflektojmë dhe të kthejmë sytë nga gjyshërit e prindërit tanë. T’u gjendemi pranë në këtë cikël të jetës së tyre sepse ata kanë nevojë për ne, njësoj siç kemi patur ne për ta kur ishim fëmijë. Flokët e thinjur dhe rrudhat e tyre janë arkivat e së kaluarës dhe dëshmi e përvojës së madhe jetësore që ata kanë, përvojë nga e cila ne kemi nevojë të mësojmë për t’i bërë gjërat më mirë”, shkruan Golemi në faqen e tij në Facebook.
