Studentët e Universitetit të Gjirokastrës kanë tashmë në duar kartën e studentit. Shpërndarja e kartave të para është bërë sot në një ceremoni simbolike në ambientet e universitetit, ndërsa procedura e aplikimit do të vijojë edhe në ditët në vijim.
Karta e studentit, vjen si një bashkëpunim i Universitetit “Eqrem Çabej” me Postën Shqiptare, Bashkinë Gjirokastër dhe partnerët lokalë. Ajo ka si synim t’u mundësojë studentëve të Gjirokastrës ofrimin e produkteve dhe shërbimeve me ulje çmimi apo kushte të favorshme. Shërbime me çmime të reduktuara dhe lehtësim i barrës financiare për jetën studentore.
Studentët tashmë do të përfitojnë një numër të konsiderueshëm shërbimesh falas, kosto të reduktuar apo edhe tarifa zero në institucionet shtetërore dhe ato private, vetëm përmes përdorimit të kartës së studentit, si një dokument unik i çdo studenti.
Përmes kësaj karte studentët përfitojnë lehtësira në shërbime të ndryshme publike dhe private si në sektorin banker, shëndetësor, art, kulturë, turizëm, transport, telefoni, librari, ushqim dhe veshje. Karta e studentit lëshohet pa pagesë. Ajo është e rinovueshme, me një barkod të caktuar dhe ofron akses në institucionet apo subjektet që do të kenë të afishuar logon “karta e studentit”. Universiteti i Gjirokastrës ka nisur tashmë bashkëpunimin me bizneset lokale për pasurimin e mëtejshëm të listës së përfitimeve pwr 1500 studentwt e kwtij universiteti.
