Për herë të parë Lazarati do të ketë në krye të tij një grua. Ajo quhet Rudina Gaba. Lajmin e njofton kryebashkiaku i Gjirokastrës, Flamur Golemi, teksa publikon disa foto nga puna e ekipit të emergjencave në Lazarat pas reshjeve intensive të shiut.
“Me Rudinën, Administratoren e re të Lazaratit dhe gjithë skuadrën tonë të emergjencave, ia dolëm të bënim të kalueshme rrugën pranë përroit të Pllashnjës. Vërshimi i ujit dhe prurjeve të përroit kishte izoluar rreth 50 familje”, shkruan Golemi në faqen e tij në Facebook.
Rudina Gaba zëvendëson në këtë detyrë Benard Pollon, kryetarin e PD-së së Lazaratit, të cilin Zamira Rami e kishte emëruar si Administrator të kësaj njësie. Gaba ka një përvojë të gjatë pune në administratën e ish Komunës Lazarat.
©argjiroja.net
