Nënkryetari i LRI: Askush nuk e merr seriozisht deputetin e Gjirokastrës

Ka mbërritur reagimi i parë nga LSI ndaj deklaratave të deputetit të PS, Vladimir Kosta. Nuk është deputet, madje është nga radhët e të rinjve të LSI.
Klevi Pojana, nënkryetar i LRI deklaron se “Vladimir Kosta është aq i parëndësishëm sa edhe pse ka kohë që flet kundër LSI askush nuk e merr seriozisht dhe askush nuk i përgjigjet, as në PS e as në LSI”, tha Pojana i ftuar dje gjatë emisionit “Debati në Channel One” të gazetarit Roland Qafoku bashkë me deputetin Gjovalin Kadeli dhe ish-ministrin Nasip Naço.
Pojana shtoi më tej se Vladimir Kosta flet si biznesmen dhe jo si politikan sepse edhe kështu njihet. “Për më tepër që Kosta është deputet në qarkun e Gjirokastër në të cilin e ka parë mirë vlerën e LSI në zgjedhjet e 2013 dhe 2015”, tha Pojana lidhur me deklaratën e Kostës se LSI nuk merr kurrë ato vota që ka marrë duke qenë në koalicion me PS.
Vladimir Kosta ka qenë një nga deputetët më kritikë ndaj LSI brenda koalicionit me deklarata publike.
Reagimi i fundit ishte dy ditë më parë teksa tha se Luan Rama flet sikur LSI të jetë në çadër dhe jo në koalicion me PS. “Nëse unë do isha në vend të Edi Ramës nuk do ta lejoja këtë shfaqje”, tha Kosta.