Një shqiptar është vlerësuar si hero në Austri pasi falë tij është arritur të ndalohet dhe më pas të kapet një përdhunues serial. Shqiptari quhet Leotrim Zhegrova dhe sipas mediave austriake, në verën e vitit 2018 ai po lëvizte me makinën e tij pranë një diskoje. Papritur ai vë re një afrikan që po ecte pas një vajze.
“Ai mbuloi fytyrën kur kalova unë”.
Shqiptari nisi të kishte dyshime dhe u kthye mbrapsht me makinë. Ai vuri re që të dy ishin zhdukur. Ishte thuajse e pamundur, aty nuk kishte as shtëpi afër dhe asgjë tjetër.
Papritur ai dëgjoi thirrjet e vajzës. Shqiptari hipi në makinë, ndezi dritat e gjata dhe nisi t’i binte borisë fort. Vajza vrapoi drejt tij dhe autori u largua.
Megjithatë shqiptari e kishte fiksuar mjaftueshëm sa për të ndërtuar identikitin. Shqiptari e mori vajzën në makinë dhe thirri policinë. Edhe pse ata ngritën helikopterin në ajër, nuk e kapën dot përdhunuesin serial. Por falë identikitit dhe hetimeve të shumta, ata kanë arritur ta mbërthejnë së fundi. Një ekip prej 13 hetuesish ia doli që të kapë 29-vjeçarin John B. nga Kamoret.
