Në Gjirokastër do të ketë shumë shpejt një qendër të re për fëmijët autikë. Lajmin e jep kryebashkiaku Flamur Golemi, teksa ishte sot për të shpërndarë ndihma në familjet që kanë fëmijë të tillë. Ai thotë se qendra e re do të vijë si bashkëpunim i Bashkisë dhe Këshillit të Qarkut.
“Me kryetaren e Këshillit të Qarkut dhe drejtorin e Shërbimeve të Transportit Rrugor ishim sot pranë familjeve që kanë fëmijë me autizëm, për të shërndarë ndihma dhe për të dhënë një lajm të mirë. Sapo të çlirohemi nga emergjenca e Covid-19, do të jetë gati shumë shpejt një qendër e re për këta fëmijë. Bashkia Gjirokastër merr përsipër projektin dhe vënien në dispozicion të një ambienti, ndërsa Këshilli i Qarkut do të bëjë financimin. Kushdo që punon me këta fëmijë meriton një përgëzim të veçantë. Fëmijët vetë meritojnë dashuri dhe mbështetje pa kushte. Autizmi nuk është paaftësi, por një aftësi ndryshe”, shkruan Golemi në faqen e tij në Facebook.
