Duart e saj, së bashku me gjilpërën e qëndisjes, lëvizin nxitimthi mbi dantellën e bardhë.
Ngadalë dhe me durim, puna e radhës së qëndistares Vjollca Mezini, po merr formën e dëshiruar. Prej 20 vitesh ajo vazhdon të punojë plot pasion dhe dëshirë dantella dhe qëndisje të ndryshme në tekstil.
“Me pëlqen dantella me dorë dhe qëndisja në makinë. I kam pasion”, thotë ajo, teksa ravijëzon format e para të qëndisjes së radhës në tekstil.
Prej duarve të saj janë zbukuruar me dhjetëra shtëpi gjirokastrite. “Njerëzit janë mjaft të dhënë pas qëndisjes me dorë, pëlqejnë gjërat e bukura dhe artistike. Në punimet e mia mundohem të nxjerr gjëra të reja, kryesisht të traditës së vendit tonë”, tregon ajo.
Të preferuara për qëndistaren mbeten punimet e thjeshta në qëndisje deri tek ato me motive të veçanta si ajo me pe të bardhë e Kalasë së Gjirokastrës, Qafës së Pazarit, etj. Profilet e shtëpive të gurta gjirokastrite apo motive të tjera artistike janë veçansia e saj.
Prej vitesh Vjollca është vënë në kërkim të punimeve të vjetra artizanale.
“Jam duke kërkuar punët që realizoheshin në qëndisje këtu e 50 vjet me parë, si rrjeta me shkopinj dhe punime të tjera që janë lënë në harresë”, thotë ajo, ndërsa plot emocion rrëmon mes disa dantellave të realizuara vite më parë nga qëndistaret gjirokastrite. Megjithëse disi të dëmtuara nga koha, këto lloj qëndisjesh sërish nuk e kanë humbur bukurinë e dikurshme.
E veçanta e Vjollcës qëndron në faktin që qëndistarinë e sheh shumë fort të lidhur me traditën dhe trashëgiminë kulturore në Gjirokastër. I pëlqen artizanati. “I shkon qytetit tonë në strukturën që ka, nuk dua të humbasë kjo traditë. Në vendet e tjera, e preferojnë shumë artizanatin, punën e dorës, pasi e shikojnë si diçka të lidhur me historinë, me tradicionalen”.
Ajo nuk punon vetëm. Prej vitesh, pasioni i është shpërblyer. Ka çelur një dyqan në Pazarin karakteristik për të tregtuar punimet e saj në dantellë me dorë apo qëndisje të ndryshme. Madje ka punësuar shumë gra të tjera, qëndistrare të zonjat si ajo. “Në fillim punoja vetë, pastaj, ngaqë u shtua puna dhe kisha shumë porosi, fillova të afroja dhe gra të tjera të apasionuara pas qëndisjes me dorë. Tani me mua punojnë rreth 20 gra, të cilat mbajnë familjet e tyre me talentin që kanë në qëndistari”.
Në fillim të sezonit turistik, të shumtë janë turistët që kanë blerë qëndismat e saj, si suvenire nga qyteti i gurtë. Vjollca nuk e fsheh emocionin që ndjen kur sjell në mend faktin që dantellat dhe qëndisjet e punuara prej saj, tashmë do të zbukurojnë edhe shtëpitë e turistëve në vendet e ndryshme të botës./konica.al
