Gjykata Kushtetuese e kalon për shqyrtim dosjen e Fredi Belerit
Pasi më 26 shtator 2023 Gjykata e Lartë refuzoi lirimin e Fredi Belerit duke e lënë të pandryshuar masën e sigurisë ‘arrest me burg’ beteja e fundit e kryetarit të zgjedhur të Himarës, por jo të betuar, zhvendoset në Gjykatën Kushtetuese.
Përmes njoftimit për median. Gjykata Kushtetuese informoi sot vendimin për kalimin e çështjes për shqyrtim në seancë plenare mbi bazë të dokumenteve.
“Ju informojmë se në Gjykatën Kushtetuese në datën 28.09.2023 është paraqitur dhe regjistruar me nr. 2 (Dh) 2023 regjistri themeltar, datë 28.09.2023 kërkesa me kërkues Dhionisios Alfred Beleri, me objekt: “Shfuqizimin si i papajtueshëm me Kushtetutën e Republikës së Shqipërisë i vendimit nr. 00-2023-1313 (224), datë 25.07.2023 të Kolegjit Penal të Gjykatës së Lartë, i vendimit nr. 19, datë 01.06.2023 të Gjykatës së Apelit për Korrupsionin dhe Krimin e Organizuar dhe i vendimit nr. 46, datë 22.05.2023 të Gjykatës së Posaçme të Shkallës së Parë për Korrupsionin dhe Krimin e Organizuar”
mbledhja e Gjyqtarëve të Gjykatës Kushtetuese në datën 23.10.2023, bazuar në nenin 21, pika 1, të ligjit nr.8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, ka vendosur kalimin e çështjes për shqyrtim në seancë plenare mbi bazë të dokumenteve” informoi sot gjykata Kushtetuese.
Beleri kërkon shfuqizimin e vendimeve të mëparshme dhe lirimin e tij për të kryer betimin si kryetar i zgjedhur në Himarë pas fitores së zgjedhjeve të 14 majit 2023.
Beleri u arrestua në ambientet e një lokali në Himarë, vetëm 2 ditë para zgjedhjeve lokale të 14 majit 2023, pasi u kap në flagrancë bashkë më bashkëpunëtorin e tij Pandeli Kokaveshi duke blerë vota.
