Katër vite më parë në Bashkinë Gjirokastër pati një ceremoni të kalimit të detyrës nga njëri kryebashkiak tek tjetri. Flamur Bime ia dorëzoi Zamira Ramit. Ishte pikërisht 29 korriku i vitit 2015. (Shihni fotot më poshtë) Ndërkohë nuk dihet nëse do të ketë një ceremoni të tillë edhe kësaj here.
Flamur Golemi merr mandatin javën e ardhshme pasi Gjykata dha vendim për zgjedhjet e 30 qershorit në Gjirokastër, ndërsa Kolegji Zgjedhor u shpreh sot për Këshillin Bashkiak. Praktikisht nuk ka më asnjë pengesë që ta vonojë ‘bashkinë e re’. Vetëm nëse Zamira Rami do të vendosë të mos e lëshojë zyrën duke respektuar kështu vendimin e opozitës së bashkuar, e cila u ka bërë thirrje kryebashkiakëve të vet të mos largohen pasi 30 qershori është i paligjshëm.
Gjasat janë që kjo të mos ndodhë. Aq më tepër kur Zamira Rami nuk është në pozita komode. Vera për të, ka për të qenë e trazuar nëse kemi kemi parasysh dosjen në Gjykatë, ku ajo akuzohet për ‘shpërdorim detyre’. Nga ana tjetër, nëse kthen kokën pas për gjithë këto muaj, që prej shkurtit, Rami ka qëndruar pasive dhe as është përzier fare me deklarata publike apo qëndrime kundër PS-së dhe Flamur Golemit.
Thënë këto, ka pak shanse që ajo të bëjë rezistencë, por jo domosdoshmërisht mund të pranojë t’i dorëzojë zyrën kryebashkiakut të ri, Flamur Golemi. Faktikisht do ishte në nderin dhe staturën e kryebashkiakut si funksion, të kishte një ceremoni për dorëzimin e detyrës. Natyrisht edhe në lartësinë e Zamira Ramit si grua. Kemi nevojë për shembuj të tillë, të shohim të zgjedhur që i pasojnë detyrën njëri-tjetrit, njëjtë siç pamë së fundi në Greqi mes Tsipras e Mitsotakis.
Duhet ta krijojmë dhe ta mbajmë fort këtë ritual në cdo zyrë të shtetit. Por edhe nëse Zamira Rami ngrihet në lartësinë që i kërkon funksioni dhe pranon Flamur Golemin në zyrë për t’i dorëzuar detyrën, ajo do të tregohet me gisht si e vetmja ndoshta ndër kryebashkiakët e opozitës që nuk respekton porosinë e PD-LSI. Sigurisht që kjo nuk i intereson as Bashës e as Kryemadhit. Megjithatë zgjedhja është në dorën e Zamira Ramit.
©argjiroja.net
