Ambasadorja e Shteteve të Bashkuara të Amerikës, Yuri Kim, ka postuar në Twitter një raport të Bashkimit Evropian për sa i përket lajmeve mbi koronavirusin.
Yuri Kim në reagimin e saj shkruan se po fshihet e vërteta për koronavirusin me anë të lajmeve të rreme.
“Raporti special i EEAS tregon se ata që kërkuan të dobësonin Shqipërinë pak vite më parë, i janë futur sërish punës, duke përdorur dizinformimin dhe propagandën për të fshehur të vërtetën, të heqin fajin dhe të pretendojnë se janë “shpëtimtarë” në krizën që shkaktuan vetë.
Historia ka rëndësi, faktet kanë rëndësi”, shkruan ambasadorja, Yuri Kim. Në raportin e postuar nga Yuri Kim që është një studim i EEAS, thuhet se kohët e fundit po qarkullojnë shumë lajme të rreme, që synojnë të fshehin të vërtetën për koroanvirusin.
Ndër të tjera në këtë raport thuhet se një shembull i “Fake News” mbi koronavirusin është kur thuhet se CoVid-19 nuk shpërtheu në Wuhan të Kinës, por në SHBA, ose në laboratorët e zotëruar nga SHBA nëpër botë.
Në lidhje me Ballkanin, në raport lexohet: “Lajmet e rreme në lidhje me Covid-19 thonë se virusi “është zhvilluar në një laborator për të shënjestruar Kinën dhe Iranin”.
Një lajm i tillë është parë në disa media të rajonit. Përhapja e lajmeve të tilla sjell disa rreziqe në Ballkan, pasi mund të përdoren si armë në zgjedhjet e ardhshme në Serbi dhe Maqedoninë e Veriut; mund të përdoren kundër emigrantëve dhe mund të përdoren nga burime të huaja për të manipuluar lajmet lokale”.
