Moo Deng, hipopotami xhuxh nga Tajlanda që u bë një fenomen në rrjetet sociale gjatë vitit 2024, ka bërë parashikimin e saj për fituesin e finales së Kupës së Botës, e cila do të zhvillohet të dielën.
Hipopotami i vogël, që jeton në Kopshtin Zoologjik Khao Kheow, rreth 110 kilometra në lindje të Bangkokut, zgjodhi pa hezitim njërin prej dy shalqinjve të përgatitur nga kujdestarët. Ajo tregoi preferencën për shalqirin me mbishkrimin ARG dhe flamurin e Argjentinës. Drejtori i kopshtit zoologjik shpjegoi për mediat se ky aktivitet është organizuar për të argëtuar vizitorët, por edhe për t’i ofruar kafshës stimulim dhe ushtrime. Ai theksoi se kjo nuk duhet të interpretohet si një mbështetje për një ekip të caktuar dhe as të lidhet me aktivitete si bastet, të cilat janë të ndaluara në Tajlandë.
Të martën e kaluar, në një aktivitet të ngjashëm, Moo Deng kishte zgjedhur Francën dhe Anglinë si dy kombet që, sipas saj, do të përballeshin në finalen e Kupës së Botës, por ky parashikim rezultoi i gabuar. Kafsha është bërë e famshme për pamjen e saj tërheqëse dhe sjelljen miqësore. Më herët, ajo u bë pjesë e vëmendjes ndërkombëtare edhe pasi “parashikoi” fitoren e Donald Trump në zgjedhjet presidenciale amerikane të nëntorit 2024.
VIDEO | El hipopótamo viral tailandés Moo Deng predice la victoria de Argentina en el Mundial. pic.twitter.com/4Zu41oUBrJ
— EFE Noticias (@EFEnoticias) July 18, 2026
Moo Deng, emri i së cilës përkthehet nga tajlandishtja si “Derrkuci që kërcen”, është një hipopotam xhuxh femër dyvjeçare. Edhe pse aftësitë e saj parashikuese nuk kanë bazë shkencore, kafshë të tjera janë bërë më parë të famshme për parashikime të ngjashme. Një nga rastet më të njohura është oktapodi Paul, i cili në vitin 2010 parashikoi saktë fitoren e Spanjës në Kupën e Botës të zhvilluar në Afrikën e Jugut.
