Aristotel Petro është rikthyer mbrëmë në studion e televizionit të tij, të dhënë me qira prej më shumë se një viti tek familja Tavo. Kësaj radhe ishte i ftuar si kandidat për deputet i partisë së Paskal Milos, Demokracia Sociale. Emisioni nis me spotin elektoral të Petros, ku ai flet për ‘gjakpirës me pushtet’, ‘korrupsion’ e ‘para publike të vjedhura’, ndërkohë që nëse kthehesh pas në vitin 2014, Aristotel Petro është kallëzuar penalisht në Prokurori për vjedhje të energjisë elektrike.
Ndonëse kandidon me PDS-në, Petro u prezantua edhe si përfaqësues në Gjirokastër i Lëvizjes Panshqiptare Pellazgjia, një lëvizje ‘fantazmë’ që minimalisht s’ka asnjë faqe në web. Më pas ai tregoi platformën e tij elektorale dhe tha se ‘kemi 600 vjet të pushtuar, prandaj ka ardhur koha të çlirohemi”. Çuditërisht Petro flet per forca të padukshme “që nuk na kanë lënë të bëjmë jetën tonë”, pa treguar së për kë e ka fjalën. Nëse keni dëshirë të dëgjoni të gjithë emisionin, i cili për nga broçkullat ia kalon edhe emisioneve me Azbi Kasajn e famshëm, klikoni në videon më poshtë.
Ndërkohë për ata që nuk e dinë, Aristotel Petro kandidon për herë të tretë në 25 qershor. Në vitin 2005 kandidoi për deputet me Partinë Lidhja e Blertë Shqiptare dhe dështoi me sukses. Në vitin 2015 kandidoi për këshilltar në Këshillin Bashkiak Gjirokastër me Partinë Aleanca Popullore dhe dështoi me sukses. Edhe kësaj radhe do të dështojë me sukses.
Por sidoqoftë, ai ka mertitë që bashkë me Azbi Kasajn apo personazhe të tjerë në garë na bëjnë humor gjatë fushatës. E nëse i rikthehesh sërish spotit elektoral të Petros, ku ai prezantohet si njeri i dhënë pas ligjit, rregullit, demokracisë, drejtësisë e të tjera vlerave, mos harroni se pothuajse gjatë gjithë kohës ai ka punësuar në të zezë gazetarë në radion dhe televizionin e tij, por dhe punëtorë të tjerë në bizneset që ka. I punësonte në të zezë duke iu shmangur detyrimeve tatimore ndaj shtetit.
Ndërsa sa herë kandidon për ndonjë post publik, shfaqet si njeri model, si sipërmarrës që respekton ligjet e këtij vendi.
Megjithatë kjo është zgjedhja e tij. Qytetarët do të bëjnë zgjedhjen e tyre në 25 qershor dhe sigurisht që Aristotel Petro nuk do të merret fare në konsideratë prej tyre.
/ArgjiroLajm.net/
