Ministri i Punëve të Brendshme, Besfort Lamallari, ka reaguar pas pamjeve me arkivolin e shfaqur në protestën e sotme në bulevard. Ai i cilëson këto pamje si të neveritshme
“Të përdorësh simbolet e vdekjes për këdoqoftë nuk është më protestë, por një përpjekje e ulët për të krijuar ndasi dhe helmuar shoqërinë me gjuhën e urrejtjes”, shkruan Lamallari.
Më poshtë reagimi i tij i plotë:
“Pamjet e arkivolit që shëtiste sot në bulevard janë të neveritshme. As si pankartë e as si dekor proteste apo për humor të zi nuk mund të përdoret kurrsesi. Për më tepër në sy të fëmijëve. Sjellje totalisht ataviste dhe e huaj qoftë për Shqipërinë e djeshme, aq me pak atë sot dhe kurrsesi e pranueshme për atë ku duam dhe do të shkojmë. Të tentosh të ndezësh qytetarët me simbolet e vdekjes është mjerim i madh politik e shpirtëror. Të përdorësh simbolet e vdekjes për këdoqoftë nuk është më protestë, por një përpjekje e ulët për të krijuar ndasi dhe helmuar shoqërinë me gjuhën e urrejtjes. Shqipëtarët nuk ua kanë borxh ritualet mortore në sheshe. Nuk është kjo kultura jonë, as tradita e të parëve tanë dhe as Shqipëria që duam t’u lemë fëmijëve”, shkruan Ministri i Punëve të Brendshme.
