Një ditë më parë kryeministri Edi Rama mori pjesë në Panairin Rajonal të Punës, që u zhvillua në Gjirokastër. Pamjet e takimit të tij me bizneset u transmetuan sot përmes ERTV. Por më shumë sesa të interesuar për punë, ishin njerëzit që shoqëronin kryeministrin. Dukej një atmosferë e vakët, mbase edhe nga numri i ulët i bizneseve që merrnin pjesë, vetëm 27 biznese, duke llogaritur këtu edhe institucine shtetërore si Agjencia Kombëtare e Zonave të Mbrojtura apo përfaqësues të Ministrisë së Mbrojtjes që rekrutonin njerëz për forcat ushtarake. Përtej këtyre, drejtori i Zyrës së Punës, Edi Pesha, i tha Ramës sapo shkeli në panair, se janë 420 vende të lira pune të kategorive të ndryshme. Më tej përfaqësuesit e bizneseve, i treguan kryeministrit mbase atë që ai donte të dëgjonte më shumë, se ka vende të lira pune, por nuk po gjejnë dot njerëz profesionistë.
Një sipërmarrës në industrinë fason solli shembullin e tre personave që i ishin larguar nga puna, ndonëse ai i paguante me 400 mijë lekë të vjetra neto në muaj. Të tjerë i thanë se nuk po gjejnë dot njerëz të kualifikuar. Pra, punë ka, por mungojnë profesionistët. Fiks ashtu siç kemi dëgjuar shpesh kryeministrin të thotë. Dhe Rama deri diku ka të drejtë, madje edhe kur thotë se shumica duan të punojnë me patjetër në shtet. Sikundër është fakt se një pjesë e të papunëve refuzojnë biznesin ‘skllavërues’ të industrisë fason për shkak të pagave të ulëta dhe kushteve skandaloze.
Ka njerëz që refuzojnë të punojnë në sektorin privat në Gjirokastër, madje edhe në ato biznese që merrnin pjesë në panair, pasi në shumë raste nuk u paguhen as kontributet shoqërore e shëndetësore, nuk respektohen ditët që janë pushim zyrtar, nuk u paguhen orët shtesë e të gjitha me radhë. Dhe kjo ndodh sepse pronarët e tyre paguajnë nën dorë te zyrtarët e administratës tatimore që duhet t’i kontrollojnë. Prandaj ata që janë të papunë synojnë më shumë sektorin shtetëror sepse e dinë që do marrin rrogën në fund të muajit, do të kenë ditë pushimi, do t’u paguhen kontributet, nuk do t’u vonohet rroga etj. Më poshtë video gjatë takimit të Ramës në panair.
© ArgjiroLajm.net
