Një shpërthim me tritol ka ndodhur në oborrin e një personi në fshatin Toç të Memaliajt. Tritoli ka shpërthyer rreth orës 00:10, në oborrin e banesës së 67-vjeçarit Butjan Kapa, teksa janë shkaktuar vetëm dëme materiale. Ai është kryetari Njësisë Administrative Qesarat.
Në një prononcim për Top Channel, Kapa thotë se nuk ka konflikte me njeri dhe se ngjarja s’ka lidhje me punën e tij si kryetar i Njësisë Administrative. Më tej ai shton se nuk ndihet i frikësuar sepse nuk i ka bërë keq njeriut.
Autori/autorët, gjatë largimit, në aksin rrugor “Krahës–Memaliaj”, në afërsi të fshatit Qesarat, dyshohet se kanë djegur automjetin me të cilin lëviznin dhe më pas janë larguar në këmbë. Shërbimet e Policisë vijojnë kontrollin e zonës për lokalizimin dhe kapjen e tyre. Grupi hetimor, nën drejtimin e Prokurorisë, vijon intensivisht veprimet hetimore për sqarimin dhe zbardhjen e plotë të rrethanave të ngjarjes, si dhe për identifikimin dhe kapjen e autorit/autorëve./ TCH
