“Kështjella e tingujve” virtuozë, jehoi në kalanë e qytetit të Gjirokastrës mbrëmjen e ditës së djeshme. Pas 30 vjetësh violinisti i talentuar Stefan Xhori rikthehet me një koncert për violinë në vendlindje. I mbështetur nga Bashkia Gjirokastër koncerti u menaxhua përmes shkollës artistike “Feim Ibrahimi” dhe GjiroKlasicca. Violinisti i njohur u shoqërua në interpretimiet e tij plot emocion nga pianistet Mimoza Rexha dhe Mimoza Çabeli, ndërkohë që pjesë e koncertit ishte edhe flautisti Flori Duzgo.
Tingujt e violinës së Stefan Xhorit, qenë të mbushura me mallin e pafund dhe nostalgjinë për vitet e rinisë. Por ato mbi të gjitha mbartnin brenda tyre petagogjinë dhe eksperiencën e babait të tij, mjeshtrit të njohur të violinës Polo Xhori. Mjeshtëria dhe virtuoziteti interpretues në këtë instrument, i shtrirë në dy breza e ka kthyer familjen XHORI, në një kështjellë tingujsh brilantë violine.
Kjo është arsyeja që kryetari i Bashkisë Flamur Golemi i akordoi titullin “Mirënjohja” njëkohësisht babait dhe të birit. Madje me kërkesë të tij, në kujtim të artistit Polo Xhori djali i tij, Stefani interpretoi atë pjesë për violinë të cilën babai e kishte lënë si amanet për tu interpretuar në ceremoninë e tij mortore.
Ndoshta pjesë e amanetit të tij të pa artikuluar ka qënë edhe organizimi i koncertit të djeshëm, ku tingujt e Kështjellës së violinës “XHORI”, jehuan në harqet e kalasë madhështore të qytetit.
