Banjat termale në Përmet janë destinacion tërheqës edhe për gjimnazistët, tash për tash nga Shqipëria.
Klasat e 11-ta të Shkollës së Mesme “Sami Frashëri”në Tiranë, udhëtuan këto ditë të ngrohta prilli drejt rrjedhës së Lumit Vjosa, në jug të vendit.
Të udhëtosh drejt Përmetit është një kënaqësi e vërtetë natyrore dhe historike. Sapo kalon Ujin e Ftohtë në Tepelenë, kthehesh majtas dhe pas disa minutash prezantohesh me urën e famshme të Dragotit.
Kjo urë ka bukurinë por edhe historinë e vetë. Lidhet me pushtimin fashist, me luftën për Çlirim dhe një urë që lidh dy zona të rëndësishme ekonomike dhe turistike, atë të Tepelenës dhe të Përmetit.
Rrepet e famshëm të Këlcyrës ishin një stacion shlodhës për nxënësit, ku u njohën me historinë dhe biologjinë e zonës së Këlcyrës.
Kurioziteti dhe destinacioni i vërtetë ishin Banjat Termale të Bënjës.
Një nga perlat e natyrës shqiptare, në rrjedhën e lumit të Lengaricës në rrethin e Përmetit.
Nxënësit ishin të përgatitur veç të tjerave edhe për t’i provuar këto ujëra të ngrohta sulfurike dhe tepër kurative. Pasi morën udhëzimet e duhura nga mësuesit e tyre rreth burimeve të këtyre ujërave, përbërjen e tyre, temperaturën si dhe kujdesin në sjelljen me natyrën dhe njëri-tjetrin, ata u futën në vaskat natyrore, luajtën në ujin e ngrohtë, e provuan fizikisht atë dhe shprehën përshtypjet e tyre për shfrytëzimin turistik dhe kurativ të këtyre burimeve.
Ky lum veç të tjerave përmban dhe shumë kanione që krahasohen me ato të lumit Osum ku gjatë stinës së verës zhvillohet sporti “Rafting”. / KultPlus.com
