Një nga sezonet më të vështira të viteve të fundit për Tiranën u mbyll me bardheblutë në vendin e gjashtë të renditjes në Superiore. Kryeqytetasit zhvilluan 36 ndeshje në kampionat, duke grumbulluar 44 pikë, me një mesatare prej 1.22 pikësh për takim, shifra që tregojnë qartë luhatjet e mëdha të skuadrës gjatë gjithë sezonit.
Tirana arriti të fitojë 11 ndeshje, po aq sa barazimet, ndërsa pësoi 14 humbje, duke regjistruar një përqindje humbjesh prej 38.89%. Ishte një edicion ku bardheblutë hasën shumë vështirësi për të gjetur vazhdimësinë, sidomos në fazën e parë të kampionatit.
Në repartin ofensiv, skuadra realizoi vetëm 36 gola në 36 ndeshje, me një mesatare prej 1 goli për takim. Edhe mbrojtja pati probleme të shumta, pasi Tirana pësoi 46 gola, ose 1.28 gola për ndeshje. Statistikat tregojnë qartë se ekipi vuajti si në finalizim, ashtu edhe në stabilitetin difensiv.
Një tjetër tregues i problemeve në sulm është fakti se Tirana mbeti pa shënuar në 10 ndeshje të kampionatit, ndërsa vetëm në 10 takime arriti të mbante portën e paprekur. Po ashtu, 50% e ndeshjeve të bardhebluve përfunduan me gola nga të dyja skuadrat. Interesant është edhe fakti se pjesa më e madhe e sfidave të Tiranës prodhuan pak gola. Në 25 nga 36 ndeshje, ose 69.44% të tyre, u regjistruan më pak se 2.5 gola, çka tregon se skuadra zhvilloi shumë takime të balancuara, por shpesh pa efikasitet në repartin ofensiv.
Megjithatë, ardhja e merkatos së janarit dhe ndryshimet e mëdha në skuadër sollën një reagim pozitiv në pjesën e dytë të sezonit. Tirana arriti të largohej nga zona e rrezikut dhe ta mbyllte kampionatin me një tjetër frymë, duke krijuar besim për sezonin e ardhshëm, ku objektivi pritet të jetë rikthimi në luftën për titull.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
