Rrugët e vendit janë shndërruar në arenë lufte. Përgjatë muajve të verës janë shënuar aksidente të rënda, ku shoferë të dehur në timon apo nën efektin e lëndëve narkotike janë përplasur me automjete të tjera duke shkaktuar viktima.
Edhe kjo e hënë e 7 shtatorit nisi me dy aksidente të rënda. Aksidenti i parë u regjistrua në autostradën Durrës-Tiranë, ku 5 automjete u përplasën me njëra-tjetrën.
Sipas policisë, automjeti që drejtohej nga 45-vjeçari Hysen Balla është përplasur me një kamion dhe, për rrjedhojë, ai humbi jetën në vend. 3 automjete që ishin pas Ballës u përplasën dhe, për pasojë, u plagosën 5 persona.
Ndërkohë, në Levan-Tepelenë humbi jetën Dashamir Beca, i cili, teksa drejtonte automjetin e tij ‘Audi’, u përplas me një “Benz”. Beca ndërroi jetë në vend, ndërsa shoferi tjetër dhe 3 pasagjerët mbetën të plagosur dhe u trasportuan në spital.
Sipas të dhënave, vetëm gjatë muajit gusht në të gjithë vendin janë shënuar 159 aksidente nga të cilët janë lënduar 229 persona. 22 kanë humbur jetën 32 të tjerë janë plagosur rëndë dhe 175 të tjerë të plagosur lehtë.
Shpejtësia tej normave, alkooli në timon dhe mosrespektimi i rregullave të qarkullimit vijojnë të mbeten ndër faktorët kryesorë që marrin jetë në rrugët e vendit.
Grupmosha 25 deri në 34 vjeç rezulton të jetë më e përfshira në aksidente, dhe e diela dita që regjistron numrin më të lartë të aksidenteve.
Për të frenuar këtë situatë, Policia e Shtetit ka ndryshuar strategjinë e kontrolleve në rrugë duke implementuar me shume teknologjinë por duket se trendi I aksidenteve nuk ka pësuar ulje.
Vetëm gjatë gushtit policia ka vendosur mbi 47 mijë gjoba disa prej të cilave me vlerë të dyfishuar.
