Ministri i Bujqësisë dhe Zhvillimit Rural, si dhe drejtuesi politik i qarkut Gjirokastër për socialistët, Bledi Çuçi, ka mbledhur në një takim kandidatët e PS-së për Këshillin Bashkiak të Gjirokastrës. Të pranishëm në mbledhje ishin edhe deputetja Artemis Malo dhe kandidati për kryebashkiak, Flamur Golemi. Çuçi thotë se PS kandidon për Këshillin Bashkiak emrat më të mirë.
“Në zgjedhjet e 30 qershorit nuk kemi vetëm kandidatët më të mirë për të drejtuar bashkitë. Për herë të parë lista e kandidatëve për Këshillin Bashkiak Gjirokastër ka një përfaqësim të gjerë e domethënës, me emra të spikatur që i shtojnë vlerë ‘Parlamentit’ të qytetit të gurtë. Jam i bindur që kjo listë është kompozimi më i mirë që Partia Socialiste ka ofruar ndonjëherë për votuesit në qytetin e Gjirokastrës dhe fshatrat përreth. Këshilli i ri Bashkiak pas 30 qershorit do duhet të luajë një rol më aktiv në raport me bashkinë dhe natyrisht të ketë një qasje tjetër ndaj shqetësimeve të qytetarëve dhe sfidave me të cilat përballet Gjirokastra. Besoj që kemi bërë zgjedhje të mirë dhe koha ka për ta provuar këtë. Suksese për të gjithë dhe faleminderit që iu bashkuat ekipit të Partisë Socialiste”, shkruan Ministri Çuçi në faqen e tij në Facebook.
