Blerja ‘big’ e Luftëtarit, merr ish mbrojtësin e U-21 të Shqipërisë

Nëntë pikë në tri ndeshjet e fundit tregojnë se Luftëtari ka lënë shijen e hidhur të rezultateve të vështira e negative të fazës së parë dhe është rikthyer bindshëm në garë për mbijetesë, që do të thotë se me ecurinë e javëve të fundit Luftëtari mund të largohet nga zona e ftohtë e renditjes e të pozicionohet në mesin e artë të tabelës. Nga ana tjetër, klubi gjirokastrit ka vendosur disa objektiva të rëndësishëm në merkato. Nëse tifozët presion një goditje të madhe ndoshta duhet të frenojnë disi në ambiciet e tyre, pasi presidenti e ka bërë këtë goditje që në verë. Sulmuesi Vasil Shkurtaj e hodhi firmën në kontratë gjatë muajve të verës por për çështje burokratike ai nuk arriti të federohej në kohë duke i kaluar në pritje 4 muajt e parë të karrierës në Gjirokastër. Gjithsesi, 25-vjeçari vlonjat që do të debutojë në fundin e muajit janar, duhet të rigjejë formën optimale edhe pse konsiderohet si një nga emrat më të lakuar në ambientin e skuadrës gjirokastrite. Ish lojtari i kombëtares shpresa dhe ARIS-it të Selanikut po stërvitet rregullisht me skuadrën dhe tashmë ka ardhur momenti për të treguar vlerat e tij pasi është pikërisht mungesa e një qendërsulmuesi që e ka penalizuar jo pak ekipin jugor. Largimi i Rexhinaldos në verë ka lënë një boshllëk të madh në repartin e avancuar dhe aktivizimi i Shkurtajt do të jetë një lëvizje e detyruar për trajnerin Hasan Lika.