Ish-komandanti i Flotës Detare, Vladimir Beja komentoi sot rihapjen e diskutimeve të çështjes së detit me Greqinë, teksa këtë javë kjo temë ishte në agjendën e ministrit grek të Mbrojtjes, Nikos Dendias, gjatë takimit me kryeministrin Edi Rama në Tiranë.
Në një studio televizive, Beja u shpreh se bëhet fjalë për një çështje të vështirë për palën shqiptare, për shkak të mungesës së reciprocitetit nga ana e shtetit fqinj.
Sipas tij, Shqipëria sot gëzon një det territorial nga OKB-ja prej 8 mijë kilometrash katrorë, që ka ka konceptin dhe mbrojtjen juridike njësoj si toka.
“Ndarja me Italinë ka qenë shumë e vështirë për palën shqiptare se ne ishim pak partizanë në atë kohë. Teknologjia jonë ishte e dobët. Sot nuk është më kjo gjë. Shqipëria nuk është vendi i ’89-ës apo ’92-it. Kemi 16 vjet që ne diskutojmë marrëveshjen me Greqinë për arsye se Greqia është partner i vështirë sidomos me Shqipërinë se mungon minimum i reciprocitetit. Pala italiane ka qenë korrekt me ne, ne ishim shtet i mbyllur. Ishte komunikimi i parë që bëja me admiralët italianë. Ata janë sjellë korrekt dhe na afruan matje teknologjike të kohës që gabimi midis nesh të ishte sa më i vogël, fakti që nuk është kundërshtuar as nga organizatat ndërkombëtare apo ligji, kufiri me Italinë është ndarë në mënyrë të përsosur. Sot Shqipëria gëzon një det territorial nga OKB, 8 mijë kilometra katrorë. Deti territorial ka konceptin dhe mbrojtjen juridike njësoj si toka. Me Greqinë kemi hasur vështirësi”,-tha Beja.
