Deri më tani kemi parë plot raste kur tregtarë të ndryshëm bëjnë biznes pa u regjistruar, pa paguar detyrimet tatimore dhe madje duke shkelur standardet e sigurisë së mallrave që ata shesin, por është ndoshta hera e parë që biznese të tilla të paligjshme i shohim edhe në ambientet që janë pronë e komuniteteve fetare. Kështu ka ndodhur në Gjirokastër, në pjesën muzeale të qytetit, ku policia dhe Autoriteti i Kontrollit Ushqimor zbuluan një dyqan mishi në ambientet e xhamisë. Mishi tregtohej nga shtetasi Bledar Guri.
Operacioni u zhvillua nga AKU Gjirokastër, në bashkëpunim me Hetimin Tatimor dhe Sektorin e Krimit Ekonomik, Drejtoria Vendore të Policisë Gjirokastër. Prej kontrollit rezultoi se subjekti, ishte i paregjistruar në QKB dhe tregtonte mish të pasigurt, pa certifikatë veterinare dhe dokumente të tjera shoqëruese. Trupa inspektuese e Drejtorisë Rajonale të AKU Gjirokastër, menjëherë mori masën urgjente për ndërprerje të menjëhershme të aktivitetit, si dhe masën administrative gjobë ne vlerën 200.000 lekë.
Ndërkohë u mor edhe masa e sekuestrimit të 43 kg mish gjedhi dhe u bllokuan mjetet e punës: frigorifer, 2 peshore, makine grirëse, 2 thika, 2 hanxharë. Këto të fundit me përfundimin e procedurave te shqyrtimit administrativ, kalojnë për ruajtje në rezervat materiale të shtetit.