Për Dasho Alikon, ish-kryeministri Sali Berisha dhe lideri historik i demokratëve, nuk është përjashtuar nga Partia Demokratike. Kështu tha Aliko shkurtimisht për mediat një ditë më parë pas përfundimit të mbledhjes së Lulzim Bashës me drejtuesit e degëve të PD në rrethe.
“Nuk është përjashtuar, nuk është pezulluar. Ai do të shkojë në Kuvend”, tha Aliko.
Sigurisht që Dasho Aliko nuk sheh ëndrra me sy hapur. E di fare mirë që Basha e ka përjashtuar Berishën, por kryetari i PD-së në Gjirokastër s’ka kurajo ta kundërshtojë publikisht këtë vendim edhe pse mendon se është një vendim i gabuar. Dihet që Dasho Aliko ka pasur historikisht një raport të veçantë me Sali Berishën, jo thjesht si lideri i një partie me një ish-kryetar komune dosido. Për vite me radhë Lazarati ishte hambari i kanabisit në Shqipëri e jo vetëm. Ky aktivitet kriminal ishte lejuar me një vendim politik të Sali Berishës, diçka që ai vetë e ka pranuar publikisht.
Dhe Dasho Aliko duke qënë kryetar komune, ishte një lloj “garanti” për Sali Berishën që ky vendim politik i tij të zbatohej. Kështu që kurrsesi Dasho Aliko mund të pajtohet me vendimin e Bashës për përjashtimin e Berishës, por e ka edhe të vështirë t’i dalë publikisht kundër kryetarit aktual të PD-së. Fundja kur nuk ka folur ende Tritan Shehu kundër Bashës, ç’i duhet Dasho Alikos mendon ai me vete. ©argjiroja.net