Pastrimi dhe sistemimi ambienteve përreth pallateve në lagje të ndryshme të Gjirokastrës është një problem më vete, njësoj edhe si trajtimi i mbetjeve urbane. Ndonëse kjo është përgjegjësi direkt e bashkisë dhe ndërmarrjeve në varësi të saj, jo gjithçka funksionon siç duhet. Ka edhe raste kur vetë banorët ‘përveshin mëngët’ dhe bëjnë praktikisht punën që duhet ta bëjë Bashkia Gjirokastër.
Sot në lagjen ‘Zinxhira’ disa banorë të një pallati, dolën vetë për të sistemuar ambientin përreth. Mes tyre ishte edhe gazetarja e Tv Klan në Gjirokastër, Dorina Muhaj, e cila ka publikuar në Facebook videon me një mesazh të shkurtër, ku mes rreshtash nuk mungon ironia me punën e Bashkisë Gjirokastër. ‘Vetëm kush mundet të na ndihmojë me numrin e komunales, t’i lajmërojmë që kur të kenë kohë të vinë t’i heqin këto që s’mundëm dot ne’, shkruan gazetarja.
Pak pas këtij publikimi, që natyrisht s’mund t’i shpëtonte kryebashkiakes Zamira Rami, fiksimi i së cilës për të monitoruar çdo gjë që del në rrjet nuk është më sekret në Gjirokastë, në lagjen ‘Zinxhira’ mbërritën punonjës të ndërmarrjes komunale. Këtë e fakton edhe gazetarja Muhaj përmes një tjetër postimi, ku falenderon bashkinë dhe kryetaren Zamira Rami. Ndërkohë që kjo ngjarje bëhet më qesharake, kur Bashkia Gjirokastër ka postuar gjithë krenari në faqen e saj mesazhin e gazetares. Ndonëse bashkia tenton ta kamuflojë aksionin e gazetares dhe banorëve të atij pallati si një shembull të mirë të kontributit qytetar për mjedisin, në fakt është një shembull i keq dhe nxjerr zbuluar punën e bashkisë.
Pra, jemi në kushtet kur një punë të cilën duhet ta kryejë ndërmarrja komunale e Bashkisë Gjirokastër, e kryejnë vetë banorët e pallatit. Sikur të mos mjaftonte kjo, bashkia shkon dhe mburret në Facebook që s’ka bërë si duhet detyrën. Qytetarët paguajnë taksat dhe tarifat për pastrim-gjelbërimin, por sërish punën e bëjnë vetë. Ndërsa Bashkia Gjirokastër u thotë ‘Bravo’ në Facebook. Shihni fotot më poshtë.
©ArgjiroLajm.net