“Torturuesit nuk duhet të lejohen kurrë të largohen nga krimet e tyre dhe sistemet që mundësojnë torturën duhet të çmontohen ose transformohen”, me këto fjalë është shprehur sekretari i përgjithshëm i OKB-së, António Guterres, në Ditën Ndërkombëtare në Mbështetjen e Viktimave të Torturës.
Tortura është një krim sipas ligjit ndërkombëtar. Sipas të gjitha instrumenteve përkatëse, është absolutisht e ndaluar dhe nuk mund të justifikohet në asnjë rrethanë. Praktika sistematike ose e përhapur e torturës përbën një krim kundër njerëzimit. Ky rregull është pjesë e së drejtës ndërkombëtare të pranuar gjerësisht. Do të thotë që çdo vend duhet ta ndjekë atë, edhe nëse nuk kanë rënë dakord për traktate specifike që ndalojnë torturën.
Kombet e Bashkuara e kanë dënuar torturën që në fillim si një nga aktet më të neveritshme të kryera nga njeriu ndaj njeriut. Ato bëjnë thirrje ta shfrytëzojmë këtë ditë për të ritheksuar se, nuk ka asnjë justifikim për torturën.
Më 12 dhjetor 1997, Asambleja e Përgjithshme e OKB-së shpalli 26 Qershorin si Ditën Ndërkombëtare në Mbështetje të Viktimave të Torturës, me synim çrrënjosjen totale të torturës dhe funksionimin efektiv të Konventës kundër Torturës dhe Trajtimit ose Ndëshkimit Mizor, Çnjerëzor ose Poshtërues.
Ka një rritje të përdorimit të torturës në mbarë botën dhe kjo lidhet pjesërisht me faktin se kemi më shumë luftëra që po zhvillohen në botë që nga viti 1945. Komiteti Ndërkombëtar i Kryqit të Kuq thotë se janë 100 konflikte të armatosura në zhvillim e sipër.
Megjithëse preteksti i mbrojtjes së sigurisë kombëtare dhe kufijve përdoret shpesh për të justifikuar torturën dhe forma të tjera të trajtimit mizor, çnjerëzor ose poshtërues, ndikimi i gjerë i torturës shpesh shtrihet përtej aktit individual, duke përjetësuar potencialisht cikle dhune ndër breza.
