Prokuroria e Posaçme drejt përfundimit të hetimeve për Kardhiq-Delvinë, çështje për të cilën janë akuzuar zyrtarë e ish-zyrtarë të ARRSH. Deri në këto momente iu është komunikuar akuza e shkeljes së barazisë në tendera, shtetases Elona Gogo, e cila ka qenë kryetare e komisionit të vlerësimit të ofertave në këtë tender. Sipas SPAK, Gogo ka favorizuar kompaninë fituese dhe ka skualifikuar kompaninë ‘Gjoka’.
Gogo është paraqitur dy ditë më parë në Prokurorinë e Posaçme e shoqëruar nga avokati i saj Sokol Hazizaj ku është njohur me akuzën zyrtare dhe të gjitha aktet hetimore. Hetimi u çel pas kallëzimit nga firma “Gjoka Construction” e Rrok Gjokës, e cila pretendoi se ishte skualifikuar padrejtësisht nga ky tender.
Është thirrur për t’u paraqitur në SPAK edhe Sonila Qato, ish-drejtoreshë e ARRSH për t’u njohur me akuzën. Mësohet se ajo ishte thirrur dje, por nuk është paraqitur për shkak të problemeve shëndetësore. Për disa të pandehur është ngritur akuza e shpërdorimit të detyrës që dënohet deri në 7 vite burgim.
Shkelja e barazisë në tendera është një vepër penale që shkon deri në 3 vite burg. Prokuroria është duke kryer hapat procedurale për njoftimin e personave në rrugë zyrtare. Ajo që solli këtë hetim, ishte një përplasje e drejtoreshës së ARRSH-së dhe një kompanie që pretendonte të merrte për ndërtim një lot të rrugës Kardhiq-Delvinë. Hetuesit e BKH po ftojnë të gjithë personat e dyshuar dhe të akuzuar.