Një ironi e dhimbshme e fatit. Vetëm dy muaj më parë, emri i shqiptarit Arlend Gjoni bëri jehonë në mediat ndërkombëtare, pasi revista prestigjioze Forbes Middle East i kushtoi një artikull rrugëtimit të tij në fushën e teknologjisë dhe inteligjencës artificiale në shëndetësi. Sot, në moshën vetëm 35-vjeçare, Arlend Gjoni nuk jeton më.
Zemra e tradhtoi papritur, duke i ndërprerë jetën një të riu që kishte ende shumë për të thënë, shumë për të ndërtuar dhe shumë projekte për të çuar përpara. Një jetë e shkurtër, por me një rrugëtim që e kishte çuar përtej kufijve të Shqipërisë, deri në Emiratet e Bashkuara Arabe, aty ku po punonte për projekte që synonin të ndryshonin mënyrën se si mendohet shëndetësia e së ardhmes.
Vetëm pak javë më parë, emri i tij prezantohej në Forbes Middle East si një nga shqiptarët që po kontribuonte në përdorimin e inteligjencës artificiale për të parashikuar dhe parandaluar sëmundjet, përpara se ato të shfaqnin shenjat e para.
Arlend Gjoni, me origjinë nga Berisha e Pukës dhe i njohur nga të afërmit si Ledi, kishte ndërtuar me punë dhe përkushtim një rrugëtim të veçantë. Nga emigracioni, ai arriti të krijonte hap pas hapi një profil të suksesshëm në biznes, duke i kthyer fitimet dhe eksperiencën e tij në investime në teknologji, inovacion dhe sipërmarrje.
Në Emiratet e Bashkuara Arabe, Gjoni ishte bashkëthemelues i Prepaire Labs, një laborator që po punonte në një prej fushave më të avancuara të teknologjisë mjekësore, aty ku inteligjenca artificiale ndërthuret me të dhënat biologjike dhe gjenetike.
Në intervistën e dhënë për Forbes Middle East, ai fliste me bindje për një të ardhme ku mjekësia nuk do të priste më që sëmundja të shfaqej për të nisur trajtimin, por do të përpiqej ta parashikonte atë shumë më herët.
Ai e shihte inteligjencën biologjike si një nga drejtimet që do të ndryshonte kujdesin shëndetësor në mbarë botën. Teknologjia ku ai po punonte synonte të përdorte inteligjencën artificiale dhe analizën e të dhënave gjenetike për të identifikuar rreziqe të mundshme shëndetësore, përpara se simptomat të bëheshin të dukshme.
Diabeti, sëmundjet kardiovaskulare dhe disa forma të kancerit ishin ndër problemet shëndetësore ku zbulimi i hershëm mund të sillte ndryshim të madh në trajtim dhe në cilësinë e jetës së pacientëve.
Ai fliste për mjekësinë parandaluese, për teknologjinë që mund të ndihmonte njerëzit përpara se sëmundja të shfaqej dhe për një të ardhme ku të dhënat biologjike do të mund të përdoreshin për t’i dhënë mjekësisë një qasje më të personalizuar.
Por sot, ndërsa familjarët dhe miqtë përballen me lajmin e rëndë të ndarjes së tij nga jeta, fjalët që ai thoshte për shëndetin dhe jetëgjatësinë marrin një tjetër dimension. Ai po punonte për të ndihmuar njerëzit të jetonin më gjatë dhe më shëndetshëm, ndërsa jeta e tij u ndërpre papritur në moshën 35-vjeçare.
