Një lajm i trishtë ka ardhur këtë të mërkurë nga Fieri. Pas një beteje të gjatë me kancerin, është ndarë nga jeta në moshën 50-vjeçare Gerti Bilero, Drejtor i Tensionit të Lartë për Njësinë Jugperëndim në OSSH.
Familja ka konfirmuar lajmin, duke lënë mes dhimbjes e lotëve bashkëshorten, dy fëmijët, si dhe të afërm, kolegë e miq të shumtë që Gerti kishte krijuar gjatë rrugëtimit të tij jetësor e profesional.
I lindur në Fier, Gerti Bilero ndoqi mësimet e para në shkollën 9-vjeçare “Andon Xoxa” dhe më pas vijoi studimet e larta në Universitetin Politeknik të Tiranës, ku u diplomua në Fakultetin e Inxhinierisë Mekanike. Ai kishte një karrierë të pasur, duke mbajtur pozicione si inxhinier, kryeinxhinier dhe drejtues në institucione të rëndësishme të fushës së energjetikës.
Fierakët e njihnin si qytetar model, gjithmonë të dashur dhe të respektuar, ndërsa për kolegët e tij, Gerti ishte shembull i përkushtimit dhe profesionalizmit.
Në jetën private, ai ishte bashkëshort e baba shembullor. Pas tij mbetën bashkëshortja, djali Keidi dhe vajza Aina.
Familja Bilero ka bërë me dije se homazhet po zhvillohen pranë “Shtëpisë Funerale Emini” në Fier, gjatë datës 3 shtator dhe nesër deri në orën 11:00, kur trupi i tij do të përcillet për në banesën e fundit në varrezat publike të qytetit.
