Rasti i vdekjes së të burgosurit shqiptar në Greqi, Ilia Kareli, i cili ndërroi jetë pas torturave në Burgun e Nigritës në Mars 2014, po rigjykohet tashmë në Gjykatën e Apelit në Selanik.
Në sallën e gjyqit janë ulur 13 ish-zyrtarë të burgut Nigrita, të cilët u dënuan në shkallën e parë me 5 deri në 7 vite burg, ndërsa njëri prej tyre u dënua me 3 vite burgim me kusht. Të gjithë ish-zyrtarët e burgut ishin të lirë në pritje të gjykimit të Apelit, me kushtin e vetëm që të mos largohen nga vendi.
Në fillimin e gjykimit të Apelit, të pandehurit mohuan akuzat kundër tyre, duke deklaruar pafajësinë. Procesi i verifikimit të provave filloi me marrjen në pyetje të dëshmitarëve të prokurorisë.
Kujtojmë se gjykata e shkallës së parë i kishte shpallur të akuzuarit fajtor për kryerjen e torturës, e cila shkaktoi dëmtime të rënda trupore për Ilia Karelin. Sipas vendimit të shkallës së parë, vdekja e të burgosurit 42-vjeçar shqiptar ndodhi pas një sulmi në zemër, pak përpara mbërritjes së tij në Burgun e Nigritës.
