Në Parlamentin Evropian, nën drejtimin e eurodeputetit Manolis Kefalogiannis, u mblodh Komisioni i 17-të Evropian, BE – Shqipëri, ku i pranishëm ishte dhe ministri i Shqipërisë për Evropën dhe Punët e Jashtme, Igli Hasani. Në këtë komision marrin pjesë 28 deputetë nga Parlamenti Evropian dhe Parlamenti i Shqipërisë.
Në seancën e PE ka patur edhe një përballje mes eurodeputetit të partisë “Demokracia e Re”, Manolis Kefalogiannis dhe ministrit për Evropën dhe Punët e Jashtme të Shqipërisë, Igli Hasani lidhur me çështjen “Beleri”.
Në fjalën e tij, eurodeputeti Kefalogiannis, theksoi ndër të tjera se çështja “Beleri” është një çështje evropiane dhe jo dypalëshe. Ai tha çështja e Fredi Belerit është përfshirë në Raport Progresin e Parlamentit Evropian për procesin e anëtarësimit të Shqipërisë në BE.
Kefalogiannis: “Çështja e kryetarit të zgjedhur të Bashkisë Himarë, Fredi Beleri, i cili po mbahet në paraburgim dhe nuk lejohet të bëjë betimin, është çështje evropiane dhe jo çështje dypalëshe mes Greqisë dhe Shqipërisë.
Çështja e Fredi Belerit është përfshirë në Raport Progresin e Parlamentit Evropian për procesin e anëtarësimit të Shqipërisë në BE. Me vendim të Parlamentit Europian në seancën plenare të datës 12 korrik 2023, është përcaktuar kuadri politik për lirimin dhe betimin e kryebashkiakut të zgjedhur të Himarës, si dhe për çështjen e pronave të minoritetit grek në Shqipëri.
Fredi Beleri është një kryetar bashkie minoritar, një kryetar bashkie opozitar, i cili akuzohet për blerje të supozuar votash dhe po qëndron në burg prej tetë muajsh.
Pyetja që dua të shtroj është nëse vendimi i Parlamentit Evropian për lirimin e menjëhershëm të Fredi Belerit dhe mundësia e betimit të tij që duhet të bëhet e mundur nga qeveria shqiptare, ka përparuar dhe gjithashtu, nëse qeveria shqiptare e ka marrë seriozisht ftesën e Këshillit Evropian për Shqipërinë lidhur me procesin e anëtarësimit të Shqipërisë? Në çfarë stadi ndodhet sot kjo çështje, duke patur parasysh edhe faktet e zbuluara së fundmi se vetë ata që denoncuan Fredi Belerin, kanë deklaruar se janë paguar dhe u është bërë presion nga policia shqiptare për të deklaruar në mënyrë të rreme se kanë marrë para nga ai”.
