Armando Broja vazhdon të ndiqet nga fati i keq. Pas rikthimit të shumëpritur nga një dëmtim i pësuar pak ditë më parë, sulmuesi u dëmtua sërish në ndeshjen që Evertoni luajti ndaj Peterborough në FA Cup.
Lëndimi ndodhi në minutën e 82-të të sfidës, gjatë një kundërsulmi të rrezikshëm. Gjatë tentativës për të kaluar mbrojtësin kundërshtar, ai u bllokua dhe përfundoi i shtrirë në fushë, duke dhënë menjëherë shenja shqetësuese.
Pas përplasjes, Broja qëndroi i shtrirë me dhimbje, duke alarmuar lojtarët dhe stafer e të dyja skuadrave. Stafi mjekësor ndërhyri menjëherë, por situata dukej aq serioze sa që u desh përdorimi i barrelës për ta nxjerrë atë jashtë fushe. Sulmuesi shqiptar u përcoll me duartrokitje nga tifozët, të cilët i shprehën mbështetjen dhe solidaritetin e tyre.
Ky është një tjetër goditje për Armando Brojën, i cili sapo kishte filluar të rimerrte formën e tij pas një dëmtimi të mëparshëm që e kishte mbajtur jashtë fushave për disa muaj. Ky dëmtim i fundit jo vetëm që mund të ndikojë në moralin e tij, por gjithashtu mund të vendosë në dyshim pjesën e mbetur të sezonit, duke qenë një humbje e madhe si për Evertonin, ashtu edhe për Kombëtaren shqiptare.
Testet mjekësore që priten të kryhen në ditët në vijim do të përcaktojnë nëse dëmtimi është i rëndë dhe sa gjatë do të mungojë ai. Mediat angleze pranë Everton raportojnë për një ndrydhje të këmbës, që mund ta mbajë jashtë për më shumë se një muaj, por ende nuk ka konfirmim.
