Ndërsa në njërën anë të garazhit të Ferrarit në Çmimin e Madh të Kanadasë në Formula 1 festohej me entuziazëm vendi i dytë i Luis Hamiltonit, rezultati i tij më i mirë me “të kuqen” pas dy vitesh, në anën tjetër mbizotëronte zhgënjimi dhe fytyra e zymtë për Sharl Lëklerkun, ndonëse piloti nga Monako e mbylli garën në vendin e katërt.
Në kushte normale, Lëklerk nuk do të ishte kaq i pakënaqur pas një fundjave ku përfundoi i pesti në Sprint, u kualifikua i gjashti dhe e mbylli garën vetëm një hap larg podiumit. Në fakt, ai renditet i treti në klasifikimin e përgjithshëm dhe është piloti më pranë Mercedesit dominues, me vetëm 13 pikë larg Xhorxh Rasëllit dhe 56 pas Kimi Antonelit. Madje, ka edhe 3 pikë më shumë se shoku i skuadrës, Hamilton. Megjithatë, Lëklerk u ankua gjatë gjithë fundjavës për ndjesitë që kishte me makinën dhe ishte shumë i prerë në vlerësimin e vendit të katërt. “Nuk e konsideroj si arritje, do të thosha më shumë se ishte fat sesa rezultat i punës sime të madhe. Ka qenë një fundjavë makthi, ndoshta më e vështira e karrierës sime në Formula 1”, deklaroi monegaksu.
PROBLEMET ME FRENAT DHE GOMAT
Edhe pse fillimisht u ankua për frenat, Lëklerk më pas vuri theksin te gomat. “Nuk kam pasur asnjë ndjesi me gomat që nga xhiroja e parë e sesionit të parë stërvitor deri te xhiroja e fundit e garës. Madje, në 15 xhirot e fundit po ecja një sekondë e gjysmë më ngadalë se ritmi normal vetëm për të mos rrezikuar. Edhe në ato xhiro pati momente kur mendova: ‘Kjo është shumë pranë limitit’. Ka qenë një fundjavë jashtëzakonisht e vështirë”, rrëfeu piloti i Ferrarit.
HAMILTON, PIKË REFERIMI
Lëklerk u shpreh i lumtur për performancën e Hamiltonit dhe e sheh atë si një shembull për t’u analizuar. “Pozitivja është se kam një pikë shumë të mirë referimi në një fundjavë si kjo, me Luisin që ishte absolutisht fantastik dhe kishte ndjesi të shkëlqyera me makinën. Kjo më ndihmon të analizoj dhe të kuptoj pse diferenca ishte kaq e madhe. Por po, ka qenë një javë shumë e komplikuar”, tha Lëklerk.
I KËNAQUR VETËM ME PIKËT
E vetmja gjë që i zbuti disi zhgënjimin ishin pikët e fituara. “Rezultati është shumë më i mirë sesa ndjesitë që kisha në makinë. Në fundjava si kjo, kur nuk ndihesh mirë me makinën, detyra ime është të maksimizoj pikët. Me pak fat, vendi i katërt është një rezultat i mirë, duke marrë parasysh sa të këqija ishin ndjesitë që pata”, pranoi Lëklerk. Tashmë, monegaksu përgatitet për garën e tij të shtëpisë në Monako, natyrisht më e rëndësishmja për të gjatë gjithë sezonit.
